`Isalindot ang pulitika’
“IHIKLIN ang pamulitika sa kasaulogan sa kapistahan ni Señor Sto. Niño.”
Mao kini ang usa sa mga punto nga gipahimugatan ni Msgr. Roberto Alesna, kura paroko sa Cebu Metropolitan Cathedral, sa iyang wali kagahapon atol sa misa sa opening salvo sa Sinulog Festival 2012 nga gipahigayon sa pilgrim center sa Basilica del Sto. Niño sa dakbayan sa Sugbo.
Samtang opisyal na nga gibuksan kagahapon ang mga kalihukan sa Sinulog Festival diin human sa santos nga misa gisunod dayon ang street dancing nga nanukad gikan sa Basilica paingon ngadto sa Cebu City Sports Center nga gisalmotan sa nagkadaiyang mga tunghaan ug nagkalain-laing mga dancer sa dakbayan sa Sugbo.
Ang pagbukas sa Sinulog Festival 2012 gipangulohan ni Cebu City Mayor Michael Rama ug mga opisyal sa kagamhanan sa dakbayan sa Sugbo nga gitambungan usab ni Gobernador Gwen Garcia ug ubang mga opisyal sa nagkadaiyang mga opisyal sa mga ahensiya sa gobiyerno ug mga deboto ni Señor Sto. Niño.
Sa iyang wali, sa way pagpanagana, si Alesna nihagit sa mga opisyal sa kagamhanan sa siyudad sa Sugbo ug mga nagdumala sa Sinulog Foundation Inc., nga himuong mahinungdanon ang Sinulog Festival ug di sagulan og pulitika ang kasaulogan sa kapistahan sa Milagrusong Bata.
Iyang gipadayag nga sud sa 32 ka tuig sa pagpahigayon og Sinulog Festival, wa niya makita nga wa masagoli og pulitika ang maong selebrasyon.
Iyang giawhag ang mga partisipante sa Sinulog, labi na kadtong mopasundayag, nga himuong desente ug mahinungdanon ang ilang presentasyon.
“Ang atong presentation, pasundayag kinahanglan nga desente, limpiyo ug significant... nga dili unta sagulan og pamulitika...” tipik sa wali ni Alesna.
Siya nanghinaut nga ang katawhan labi na ang pamilya magiyahan sa tinu- od nga hiyas ni Señor Sto. Niño.
Siya nidugang sa iyang wali nga padayon sila nga nag-ampo sa tanang mga opisyal nga gisanungan sa pagpadagan sa pangagamhanan.
Nakadayeg ug nagpasalamat usab siya sa liboan ka mga tawo nga nisalmot sa Walk with Jesus niadtong Huwebes sa kaadlawon sa unang adlaw sa nobenaryo sa tinuig nga Pista Senyor bisan sa katugnaw sa panahon ug hulga sa uwan.