Only in my dreams

NANGAWOT ko sa akong ulo nganagtan-aw kang Nick. Naghilom lang siya ug wa motubag sa akong gipangutana kaniya. Morag duna siyay gihinuktukan. Ang iyang panan-aw didto sa gawas, sa mga talan-awon nga among nalabyan. Nagsubay na ang gisakyan namong bus sa reclamation sa Mandaue. Wa ko makapugong sa akong kaugalingon, gikuhit ko si Nick. “Hoy! Naunsa ka?” Nakakatawa ko sa reaksyon ni Nick. Nakalitan siya. Morag gikan sa taas nga pagkatulog nga napugwat lag kalit. “H-HA? Kay ngano man diay, Marriane?” “Sus! Lawom kayo kag hunahuna, uy!” Mipahiyom si Nick, pero sa akong tan-aw, morag napugos lang siya sa pagdasig sa iyang kaugalingon.

“Nangutana ko nimo, uy, bahin ninyo ni Olga. Musta na kamo?” “Aw, abi kog unsa.” Nadiyong ang akong mga mata. Morag di interesado si Nick nga hisgotan namo si Olga. Klaro sa iyang tinubagan.

“Natural nga pangomustahon ta mo kay uyab gud mo. Unya, friend ta. Friend ko sab si Olga. Wa kay angay itago, di ba?”

Kauban namo ni Jannet si Olga kaniadto sa boarding house sa Escario pero mibalihin si Olga og laing boarding house sa Borromeo. Schoolmate namo ni Jannet si Olga sa UC.

“Okay lang mi si Olga, Marriane. Ikaw, musta na ang imong lovelife?”

Gisulirapan ko si Nick. “Ikaw, ha? Bisag nasayod ka na nga loveless ko, mangutana ka pa gyud ana?” “Sus, hangtod ba karon wa gihapon kay uyab?” “Kay ngano, di diay di ka motuo nako nga nagtug-an man ko sa tinuod?”

“Okay. Motuo na lang ko aron ta madali. Pero tell me the truth, duna gyuy nangulitawo nimo?”

“Duna, uy!” Dali ra kaayo kong nakatubag. “Usa pa gani ka batalyon. Bitaw, joke lang. Kadaghan man sab kaha, no?” “Wa gyud kay nagustohan nila, Marriane?” “Duna unta pero morag duwa-duwa man lang ang iya nako.” “Unsaon man nimo pasiguro nga duwa-duaw lang ang iya nimo kon di mo siya sugton? Sugta siya, Marriane, kay basig siya ang lake para nimo.”

Nakatan-aw kog dunay kang Nick.