Fight Ground Championship sa Days Hotel
GIPABUHAGAY sa mga nag-organisar nga mas kulbahinam ang mga aksyon sa Fight Ground Championship III nga gikatakda karong Pebrero 18 sa Days Hotel sa Mandaue City.
Sa press conference kagahapon sa Chill Out Madness Bar sa Panagdait, Mabolo ning dakbayan, si Backfist Promotions president Joseph Lanuza nagkanayon nga ilaha gyung gipili og insakto ang MMA fighters nga makalingaw gyud sa mga tumatan-aw.
Ang Backfist Promotions maoy nagpasiugda sa kalihukan katambayayong ang Chill Out Madness Bar.
Lakip sa fighters nga mopakita’g aksyon batok sa lainlaing kontra mao sila si Romeo Espra, Jonjier Torbiso, ug Gino Po.
“Pare lang aning Espra, mura ni siya’g si (Manny) Pacquiao sa MMA. Segurado gyung ma-amaze ang mga motan-aw sa duwa niya,” matod ni Lanuza.
Si Ali Malawi, Backfist Promotions commissioner ug matchmaker, nagkanayon nga dekalidad nga mga kontra ang iyang ipangparang sa mga nangahisgutan.
Hinuon sa kasamtangan, wala pa na-finalize ang mga parisan sa promosyon.
“But we’ll make it sure nga nindot gyud ang mga away ani,” matod ni Malawi.
Lakip sa mga gitutokan og atensyon sa mga nagorganisar mao ang officiating aron wala na gyu’y reklamo nga motumaw sama sa nahitabo sa nag-unang duha ka mga edisyon sa promosyon.
Gipasabot ni Malawi nga kinahanlang rehistrado gyud sa Games and Amusements Board (GAB) ang mga referee ug judges sa promosyon.
Gawas niini, nidugang si Malawi nga mopahigayon sa sila og seminar sa mga referee ug judges pipila ka mga adlaw sa dili pa ang adlaw sa kombati.
Sa laing bahin, giawhag ni Lanuza ang tanang MMA fighters ug gym owners sa Sugbo ug kasikbitang mga dapit sa pagsalmot sa ilang sunodsunod nga promosyon.
“Gi- invite nako katong tanang fighters nga nakatulog na lang kay wala’y duwa. Puwede na silang moapil diri sa ato kay every quarter man ang atong promotion,” matod ni Lanuza.
“Bisan ginagmay lang ning atoa pero at least, ang atong fighters dili mablanko.”