Hawks gibawsan sa Heat

GIPAMATUD-AN sa Miami Heat nga kaya ra nilang mobarog bisa’g wala ang duha sa ilang labing pambato pinaagi sa pagbuntog sa host Atlanta Hawks, 116-109, human sa tulo ka mga overtime kagahapon sa NBA.

Sa pagkawala nila ni Dwyane Wade ug Lebron James, ang Heat mingsalig og maayo nila ni Chris Bosh ug Mario Chalmers sa pagpakigkombati sa Hawks sulod sa 63 ka mga minutos.

Gipangulohan ni Bosh ang kadaugan pinaagi sa iyang 33 puntos samtang nidugang og 29 puntos si Chalmers, 22 niini iyang gimugna human sugod sa 4th quarter lakip na ang pito ka puntos sa ikatulong overtime.

“Coach said I had to be aggressive,” batbat ni Chalmers.

Si Wade duha na ka mga duwa nga wala gumikan sa iyang angol sa wala nga tiil samtang si James wala nakaduwa gumikan sab sa angol sa iyang wala nga tiil.

Pagkahuman sa regulation period, si Bosh nakamugna og threepointer aron pagpugos sa premirong overtime.

“It was a lucky shot,” paghulagway ni Bosh sa iyang tira.

Bilib gyud si Heat coach Erik Spoelstra sa gipakita sa iyang mga ba- tos kay wala gyud kini nagpaapekto bisan sa grabe nilang piang.

“Both teams played their hearts out there at the end.”

Nimugna og 20 puntos si Joe Johnson alang sa Hawks, nga wala’y nahimong puntos sa ikatulong overtime. Kini maoy ika-10 nga higayon sa kasaysayan nga wala nakapuntos ang usa ka team sa overtime.

Gipasabot ni Hawks coach Larry Drew nga iya nang daan nga gipahimangnuan ang iyang mga batos nga dili gyud mokompiyansa bisa’g wala sila si James ug Wade.

Ang kabalaka ni Drew mao gyud ang nahitabo alang kaniya,

“There was a total, total mental letdown,” Drew, kansang mga batos ningpukan sa Heat 100-92 niadtong Martes bisan naa pa sila si James ug Wade niadtong higayuna.