Lakers gipukan sa Blazers
NINGMUGNA og 17-6 run sa 3rd quarter ang host Portland Trailblazers aron paghimo’g agianan paingon sa 107-96 nga kadaugan batok sa Los Angeles Lakers kagahapon sa National Basketball Association (NBA).
Nakuha ni Marcus Camby ang rebound human nasipyat si Lakers superstar Kobe Bryant sa iyang three-point attempt unya gipasa ni Camby ang bola ngadto kang Gerald Wallace, kinsa nimugna og windmill dunk niadtong higayuna aron hatagan ang Trailblazers og 70-66 nga labaw sa tungatungang bahin sa 3rd quarter.
Human niadto, hugot na gyud ang pagtuo ni Wallace nga malupig na sab nila ang Lakers.
“I think that was the game-changer,” batbat ni Wallace, kinsa mikomedya nga gimugna lang niya ang maong windmill nga hansak kay misaad man sab ang iyang kauban nga si Lamarcus Aldridge nga mohimo sab niini.
“Watch out for L.A.’S windmill next,” dugang ni Wallace.
Gipangulohan ni Wallace ang kadaugan pinaagi sa iyang 31 puntos samtang nidugang og 28 puntos ug 10 rebounds si Aldridge.
Sama sa naandan, ang Lakers gipangulohan ni Kobe Bryant pinaagi sa iyang 30 puntos samtang nitunol og 21 puntos ug 12 rebounds si Andrew Bynum.
“They (the Blazers) played a heckuva game,” asoy ni Lakers coach Mike Brown. “Portland came out in the second half and pushed the pace, and we came apart.”
Nagsalimuang sab gyud hinuon ang Lakers hilabi na ang ilang tira sa gawas diin wala gyud sila’y napasulod nga three-pointer sulod sa 11 ka mga pagsuway.
Kini maoy labing unang higayon nga wala nakapasulod og three-point shot ang usa ka team sa usa ka duwa gikan niadtong Nobiyembre, 2003.