LOLA GIPATAY SA APO
Iyang gitulis samtang sila nag-inom; nawong sa 70-anyos naguba, ulo nabuak pagbunal
WA na mahitsura ang panagway sa 70-anyos nga lola nga gibunalbunalan hangtod namatay sa iyang apo nga iyang gikainom apan niunay pagtulis kaniya niadtong Biyernes sa kaadlawon sa Barangay Unidos, lungsod sa San Francisco, Isla sa Camotes.
Si Francisca Donaldo, biyuda, namatay tungod sa pagkabuak sa ulo ug wa na mahitsura ang nawong tungod sa pagbunalbunal sa iyang apo sa dakong kahoy nga gigamit nga handle sa galingag mais nga bato.
Ang suspek giila sa kapulisan nga si Florencio Donaldo Julliesa, 34, ulitawo, way trabaho.
Sa sinugdan, niangkon ang suspek atubangan sa kapulisan nga siya ang nipatay sa iyang lola apan wa na mopirma sa extra-judicial confession atubangan sa usa ka abogado.
Gikuha niya ang tinigom sa iyang apuhan nga P2,000 nga iyang nautingkayan sa karton sa mga senina.
Si Insp. Jonas Tahadlangit, hepe sa San Francisco Police nga nahinabi sa Sun.Star Superbalita, nihulagway sa apuhan nga kusog nga moinom.
Nakig-inom kini sa iyang apo, kinsa anak sa iyang anak nga babaye, nianang gabii sa Biyernes.
Apan ilang gituohan nga ala 1 na hangtud sa ala 3 sa kadlawon kagahapon, posibling gipatay ang biktima sa iyang apo sanglit mga alas 10:00 sa gabii niadtong Biyernes ang mga silingan nakakita pa nilang duha nga nag-inom.
Matod ni Tahadlangit nga si kapitan Alex Maramba maoy nipahibawo kanila kalabot sa insidente.
Si Tahadlangit niingon nga maayong pagkagusbat sa nawong ug nabuak ang ulo sa biktima human bunali og makadaghan sa suspetsadong hubog.
Niangkon sa krimen ang suspek dihang nadakpan sa kapulisan.
Iya kining gihimo atubangan sa iyang inahan ug ubang mga anak sa biktima.
Apan kalit lang nausab ang huna-huna niini, wa na mopirma sa extra-judicial confession.
Si PO2 Rex Sugarol, desk officer sa San Francisco Police nga nahinabi sa Sun.Star Superbalita, niingon nga ang anak sa biktima nga si Jose Donaldo, uyo-an sa suspek, nibutyag kaniya ang iyang pagumangkon maoy nipatay sa iyang inahan.
Ang iyang igsuon nga maoy inahan mismo sa suspek maoy nihimo sa krimen kay niangkon human nakonsinsiya sa pagpauli niini sa ilang balay pagkakaadlawon.
Dunay suway nga pag- cover up sa krimen human ang sinena sa suspek nga nagkadugo gilabhan.
Apan nasubay gihapon dihang ang kwintas niini nagkadugo mao nga niangkon sa krimen.
Napalgan ang biktima sa duha ka mga menor de edad nga anak babaye ni Jose, kinsa niduaw sa ilang apuhan sayo sa alas 5 sa kadlawon.
Usa ka saksi nga silingang lalake nibutyag sa kapulisan nga si Florencio nagdali sa paggawas sa balay ug nidagan.
Si Jose sab nibutyag nga ang suspek maoy uban sa iyang inahan nga nag-inom sa ilang balay.