EX-CON GISAKA SA BALAY, GIPATAY

EX-CONVICT gisulong ug gisaka sa ilang balay ug gipatay pasado alas 2 kagahapon sa kaadlawon sa dalan Belgium, Barangay Pasil, dakbayan sa Sugbo.

Ang biktima nakatulog na unta, apan gisangpit ug gisaka sa ilang balay.

Ang biktima nga samdan sa iyang bukton ug buko-buko mao si Raymund Jesus Aro, 24, usa ka estambay, nabilanggo niadtong Agosto sa 2011 ug nakagawas niadtong miaging buwan sa kasong pagpangawat.

Sa pasiuna nga imbestigasyon nga gihimo nila ni SPO4 Rey Cuyos ug mga kauban sa Homicide Section sa Cebu City Police Office (CCPO) nagbutyag nga nakatulog na unta si Aro dihang ning-abot ang duha ka mga tawo sa ilang balay ug gisangpit ang iyang pangalan.

Ang inahan sa biktima nga si Elizabeth nakadungog ug gitubag niya nga natulog na ang biktima ug ugma na sila pabalikon.

Apan wa maminaw ang maong mga tawo, nisaka kini sa ilang balay ug nadungog sa inahan nga diha sa pikas kwarto ang lagubo ug pipila ka segundo nisunod ang buto-buto sa armas de fuego.

Bisan pa man kon samaron, nakagawas pa ang biktima ug nakadagan gawas sa ilang balay.

Apan mga kapin sa 100 ka metros, nahagba siya sa dalan.

Daling nibiya sa dapit ang mga suspek agi sa interior portion sa dapit samtang si Aro gidala sa kapulisan sa Cebu City Medical Center ug gideklarar nga dead on arrival.

Gisubay sa kapulisan kon may kalambigitan ba sa pagkapriso sa biktima ang pagpatay niini.