Seryuso ko: Magpale

NANALIPOD si Acting Governor Agnes Magpale sa iyang pagkwenta sa mga bayranan sa Kapitolyo sa ilang mga supplier, contractor ug service provider.

Siya nibarog nga seryuso siya sa iyang pagdumala sa renda sa pangagamhanan sa lalawigan isip acting governor ug wa siya magbinoang sa pag-ihap sa mga utang sa Kapitolyo.

Mao kini ang reaksiyon ni Magpale human si suspended Governor Gwen Garcia namahayag nga mas maayo sari-sari store ang iyang ipadagan inay ang probinsya tungod kay kanunay kini nagtan-aw sa listahan sa mga utang sa Kapitolyo.

Sa interview sa sibyaanang dyMF Bombo Radyo Cebu kagahapon sa buntag, si Magpale niklaro nga dili niya tinguha nga dauton ang imahe sa probinsya pinaagi sa pagtug-an sa tinuod nga sitwasyon sa panudlanan sa lalawigan.

Siya nipasabot nga mahinungdanon nga mahibaw-an ang kahimtang sa panudlanan sa probinsya gumikan kay unsaon niya pagsugod sa pagdumala sa probinsya kondili siya masayod niini.

Siya nipatin-aw ang mga supplier ang nangadto sa iyang buhatan aron maningil sa bayrunon sa Kapitolyo.

“I am sorry if that is how she sees the situation but every day, nagkadaghan ang maningil,” padayag ni Magpale.

Ang mga supplier ug contractor nag-abot-abot sa pagpaningil sa utang sa Kapitolyo human nareport nga nabangkarota na ang lalawigan.

Apan si Garcia niklaro nga wala mabangkarota ang probinsya ug dunay igong kwarta sa pagbayad sa mga nautangan niini.

Ning ulahi, ang tag-iya sa 3L Catering nga si Rosalinda Du niingon nga utangan og P1.5 milyones ang kagamhanan sa probinsya alang sa packed meals, catering ug snacks sa nagkalainlaing mga kalihukan.