Campaign materials idili sa Sinulog festival: opisyal

HINGPIT nga gidili sa Sinulog Foundation Inc. ang campaign materials sa mga kandidato aron mapabilin ang pagkabalaan ug pagkasagrado sa kapistahan ni Señor Santo Niño.

Kini ang gibutyag ni Ricky Ballesteros, executive director sa SFI, nga niingon nga kini aron di masagulan og pulitika ang tinuig nga kalihukan gumikan usab sa nagsingabot nga piniliay karong Mayo.

Di na bago sa katawhang Sugbuanon nga mohugop ang mga pulitiko hilabi na ang mga nangandoy nga mapili sa mga nasudnong puwesto sama sa pagka senador.

Ang mayor ug presidente ra sa nasod, kon motambong man si Presidente Benigno Aquino III, siya ra ang gitugotan nga makapasupot og mensahe ngadto sa mga dumoduong.

Sa ilang meeting sa SFI, si Ballesteros nibutyag nga nagkasabot na sila sa Prevention Restoration Or der Beautification Enhancement (Probe) ang kanhi Speed nga maoy motangtang sa mga propaganda material sa mga pulitiko nga nahimutang sa 6.1 kilometros nga rota sa grand parade.

Dugang ni Ballesteros nga way pili ang pagtangtang sa mga campaign material maiya man sa Team Rama o sa Bando Osmeña Pundok Kauswagan.

Gipasabot sa executive director sa SFI nga bugtong ang mga sponsor lang sa Sinulog ang ilang gitugotang makabutang sa ilang mga tarpaulin sa Sinulog route.

Gipadayag usab niya nga ilang badlungon, kon di mopatuo, ilang sakmiton ang mga campaign material nga dadon sa ilang mga supporter ma lokal man o national nga kandidato aron mopahimos sa kadaghan sa mga tawo.

Si Ballesteros niingon nga angay atangan sa katawhan ang 2013 Sinulog Festival kay mas nindot kon itandi sa miaging tuig.

Sa miaging adlaw, 37 na ka mga entrante ang nagpalista nga moapil sa grand parade.

Lakip sa nagpalista mao ang Placer, Masbate nga kampiyon sa Sinulogbased ug AlangAlang sa Leyte nga kampiyon sa free interpretation.