Rama mikuwestiyon sa pagkatudlo sa bag-ong OIC nga direktor sa CCPO

GIKLARO ni Mayor Michael Rama nga way personalan ang iyang reklamo sa pagkatudlo ni PS/Supt. Mariano Natu-el isip officer in-charge (OIC) sa Cebu City Police Office (CCPO).

Gani, iyang gidayeg si Natuel ug iyang gipahimangnoan ang kasamtangang hepe nga mohimo sa iyang katungdanan samtang naglingkod pa siya isip OIC.

Apan ang gikuwestiyon sa mayor mao ang proseso kay wa siya konsultaha sa pagtudlo kang Natuel nga mao untay naandan.

“Natuel is a good man. Natu-el has nothing to do with it (proseso),” matod sa mayor.

Si Rama niadto sa Camp Crame ug Malacañang aron pagpangayo og katin-awan sa pagkatudlo ni Natuel sanglit ang gusto niya nga mao sab ang giduso ni Buenafe nga mohulip kaniya mao si PS/Supt. Noli Romana.

Si Police Regional Office (PRO-7) Director Chief Supt. Marcelo Garbo niklaro nga way pamulitika ang pagtudlo kang Natuel.

Gipasabot ni Garbo nga ang kadagkuan sa Camp Crame maoy nibutang kang Natuel isip OIC sa CCPO human si Mayor Rama way nauyonan sa tulo ka mga official nga ilang girekomendar.

Matod niya nga ang mayor nipadalag suwat kaniya nga naghangyo nga ipa- extend ang paglingkod ni Sr. Supt. Ramon Buenafe sa CCPO hangtod mahuman ang Sinulog 2013.

Ang maong suwat gi- forward sab ni Garbo ngadto sa Campo Crame apan gisalikway ni Director General Allan Purisima kay estrikto sila sa polisiya nga ang hepe nga nakalingkod na og duha ka tuig sa usa ka dapit, kinahanglang ibalhin.