Pacman mipadayag sa kahimsug
GITATAW ni 8-time world champion Manny Pacquiao nga himsog kaayo siya ug wala’y angayang kabalak-an ang iyang mga sumosunod.
Mao kini ang nagsilbing reaksyon ni Pacquiao kabahin sa gipamahayag sa usa ka neurologist nga aduna kini nakitang senyales nga posibleng mataptan og sakit nga Parkinson’s Disease ang Pambansang Kamao sa Pilipinas.
“I am doing good. God is good,” interbyu sa usa ka nasyunal nga Pacquiao nga migawas sa www. philboxing.com.
Si Pacquiao kasamtangang naa sa Israel nga nagbakasyon kauban ang iyang pamilya.
Gipasabot ni Pacquiao nga nasurpresa ug natingala gyud siya dihang iyang nasayran ang obserbasyon ni Dr. Rustico Jimenez.
Hinuon gitino ni Dr. Jimenez nga wala siya nakaeksamin kang Pacquiao ug dili sab sila suod niini apan aduna siya’y nakitang kalainan sa mga paglihoklihok ni Pacquiao sa television interviews niini.
Matod ni Dr. Jimenez nga iyang nabantayan nga magsige og lihok-lihok si Pacquiao sa television interviews nga matod niya usa ka senyales sa Parkinson’s Disease.
Sa kasamtangan, nagsagubang ning maong sakit ang American trainer ni Pacquiao nga si Freddie Roach ug boxing legend Muham- mad Ali.
Daghan sab gyud ang nabalaka – usa na si Dr. Jimenez – sa kahimsog ni Pacquiao dihang nahisugamak kini sa grabeng 6th round knockout nga kapildihan batok kang Mexican Juan Manuel Marquez ning bag-uhay lang.
Basi sa iyang obserbasyon, si Dr. Jimenez mitambag kang Pacquiao nga angayan na gyud kining moretiro samtang dili pa ulahi ang tanan nga gialkontra kini ni Pacquiao.
“I will be the one to say that I will retire from boxing because I am the one who knows and feels what my body is telling me,” batbat ni Pacquiao.