Pacquiao, PBA finals
DILI kay atong isalikway ang posibilidad, pero kining gibutyag sa usa ka neurologist nga si Dr. Rustico Jimenez nga si Manny Pacquiao adunay sentoma sa Parkinson’s disease, usa ka iresponsabli ug immature nga pamahayag ug dili pa gyud unta angay nga iladlad sa publiko.
Kini tungod kay iyang kaugalingong obserbasyon ug way igong basihanan tungod kay siya mismo miangkon nga wa gyud siya personally maka check up sa panglawas ni Pacquiao. Mahimong tinuod o sakto siya sa iyang pangagpas o obserbasyon, pero mangita una siya og igong basihanan nga nagmatuod sa iyang pamahayag.
Sensitibo ang maong isyu, kay career man ni Pacquiao ang na- involved niini ug di gyud unta dali-dalion niya sa pag-ataki. Nganong di man niya tanyagan si Pacquiao nga iyang ipaubos sa medical check up una pa siya moluwat og pamahayag.
Dili isyu kon sakto o sayop ba ang iyang pangagpas, kon dili ang pagpadayag og sayo ngadto sa publiko kalabot niini nga wa man unta siyay igong basihanan.
Basin gusto lang siya og publicity. Good kon matukma ang iyang gibutyag, pero kon masipyat posibling moundlod ang iyang credibility.
So, natukma gyud ang atong pangagpas sa atong lindog niadtong Disyembre 29, 2012 nga ang Talk ‘N Text Tropang Texters ug ang Rain or Shine Elasto Painters mao gyud ang mag-abot sa finals sa PBA Philippine Cup. Samtang ang Texters mipalagpot sa Alaska Aces sa semis, 4-2, ang Elasto Painters mipukan usab sa San Mig Coffee Mixers, 4-2, sa ilang kaugalingong serya sa semis. Gawas nga eksperyensiya ug sa gidagkuon sa Texters, teamwork na usab kaayo kini kay taodtaod na usab kining intact ang lineup. Pero bisan pa man og nataktak ang Aces, mapasigarbuhon gihapon kini sa ilang gipakitang performance sa kinatibuk-ang conference, tungod kay bisan pa man sa ilang kabatan-on, sa wa damha, makaabot sila sa semis ug nakahatag pa gyud og dakong hudlat sa two-time defending champion Texters. Ang Elasto Painters nga sangkap ug balanse usab sa materiyales, disiplinado sulod sa korte. Ang consistency ni Jeff Chan sa perimeter area ug ang ilang defensive rotation sa shaded lane maoy nakaparalisa sa opensa sa Coffee Mixers. Expect a physical Texters-Painters finals showdown. Kinsa kanila ang maka- execute og maayong depensa ug aduna usay hataas og pasensiya maoy makadala sa kampiyonato. Dinhi nakabintaha og gamay ang Talk ‘N Text. Mas matured sila nga mo- handle sa pressure. Sa pagkatinuod lang, ang akong sempatiya atoa sa Rain or Shine, pero sa akong pinubring panglantaw sa duwa, Texters maoy moguwang mananaog sa Game 6 o 7. junmigs0622@yahoo.com