ARTISTA NAKABANGGA, `MI HIT-AND-RUN’

MOKABAT sa 20 ka mga disgrasya sa kadalanan sa siyudad ang nahitabo sukad niadtong Biyernes hangtod kagahapon sayo sa buntag.

Ang hitabo mao ang usa ka kaso sa giingon hitand-run nga gikalambigitan sa usa ka artista sa usa ka television channel ug produkto sa usa ka reality show.

Nahitabo kini pasado alas 3 kagahapon sa kaadlawon sa Maracas, Barangay Lahug.

Ang Sun.Star Superbalita nipugong sa ngalan sa artista kay kompirmahon pa kini sa traffic authorities.

Apan pipila ka mga saksi nakaila kaniya kay nakakita sa telibisyon tungod sa giapilang reality show.

Sa pasiuna nga imbestigasyon sa Cebu City Traffic Division nagkanayon nga nagtungas sa dalan ang usa ka Honda CRV ( YGU-752) nga giingong gimaniho sa artista sa dihang kalit kining nitabok sa pikas nga bahin sa karsada.

Nisugat kini sa motorsiklo nga may plate number 7TCO-1166 nga gimaniho ni Elmer Avila, taga Brgy. Malubog.

Nakabantay si Avila ug daling nakalayat sa iyang gisakyan nga motorsiklo.

Ang iyang sakyanan naigo sa CRV samtang siya nakalayat nakaangkon og pangos ug bun-og.

Human maigo ang motorsiklo ni Avila, nilahos kini sa nakaparada nga multicab (YBE-752) nga gimaniho ni Jimmy Molina, taga Mambaling.

Si Molina naangol human mapantok sulod sa sakyanan.

Nalakip sa pagkaigo ang koral sa panimalay ni Perla Daquil ug gate sa silingan niya nga si Lourdes Olitres.

Giingong wa mohunong ang driver sa CRV ug nipadagan kini bisan sa mga kadaut nga iyang nahimo.

Samtang ang mga nangaangol gipangdala sa tambalanan.

Hinuon, ang mao nga aksidente mao ra ang labing dako.

Ang ubang mga disgrasya naglambigit sagad sa mga motorsiklo.