Monitoring team alang sa recla project, gitukod

ANG Department of Environment and Natural Resources (DENR 7) ug kagamhanan sa dakbayan sa Lapu-Lapu nagtukod og multipartite monitoring team (MMT) alang sa pagduma sa Mactan North Reclamation Development Project sa maong siyudad.

Si DENR 7 Regional Executive Director Dr. Isabelo Montejo nagkanayon ang MMT maoy mobantay sa environmental management and monitoring plan (EMMP) ug ubang mitigation measures nga nalatid sa project environmental impact study (EIS) ug sa environmental compliance conditions (ECC) alang sa maong proyekto.

Base sa EIS online system sa Environmental Management Bureau (EMB), ang ECC giisyu niadtong Abril 22, 2009 ngadto sa MNRDP alang sa pag- reclaim ug pagpalambo sa 400 ektarya nga luna nga nahimutang sa Magellan Bay sa mga Barangay Ibo, Buaya, Mactan ug Punta Engaño.

Si kanhi DENR Secretary Jose Atienza, Jr. ang niaprobar niini.

Nalatid sa ECC nga sa dili pa sugdan ang reclamation, kinahanglan malukat una ang mga clearance ug permit gikan sa hingtungdan nga mga ahensiya sa kagamhanan.

Kinahanglan ang proponente motuman sa matag proseso unsaon paglukat sa clearance gikan sa DENR sa dili pa sugdan ang pagtrabaho niini.

Niadtong Enero 9, nagtagbo sa usa ka organizational meeting ang pipila ka mga opisyal sa LapuLapu City government, DENR 7, EMB 7 ug ubang stakeholders diin giila ang mga molangkob sa MMT ug nadiskutir ang pag-umol og memorandum of agreement (MOA) ug work and financial plant (WFP) sa katukoran niini.

Ang MMT mao usab ang in-charge sa pag- monitor sa katukoran ug pagpalambo sa proyekto sa matag hugna.

Si William Cuñado, hepe sa Environmental Impact Assessment Management Division sa EMB 7 niingon nga mahinungdanon ang pagtukod og MMT alang sa maong proyekto.

Si Montejo sa iyang bahin nalipay usab sa katukoran sa maong team ug sa nagkadaiyang mga komi- tiba niini.

“There are certain things or issues that need to be ironed out or deliberated on at the level of the MMT and by strengthening with credible persons with various disciplines it could deliver its tasks or functions well,” pasabot niini.