Pit Senyor!
NABAWO sa pag-usab sa mga plano kabahin sa ilang supplies ug kadaghanon sa mga tawo ang mga nangsalmot sa float category dihang gianunsyo sa Sinulog committee nga di mahimo ang duha ka mga service vehicle matag float. Gikan sa wa makaabot og 20 ka float sa miaging tuig, niabot matod pa ngadto sa 40.
Kay kinahanglang masulod ang dugang mga nangsalmot sa ruta sa parade, gipagamyan ang kadak-on.
Kay nisalmot man ang GT Cosmetics sa unang higayon karon ug kliyente kini sa akong misis, naa koy inside look sa ilang maingon nato nga logistical challenge.
Pananglitan, ang ikaduhang support vehicle mao unta ang usa ka coaster nga aircon aron maoy kapahulayan sa mga tag-iya ug mga model. Butanganan kini sa mga supply nga gikinahanglan sa tibuok delegasyon sama sa tubig ug pagkaon. Mao sab unta kini ang ilisanan sa mga model ug dapit alang makapahulay ang mga sakop sa delegasyon.
Nakahibawo na man kita nga magsugod mga alas 7 sa buntag ang parade ug mahuman alas 7 sa gabii. Sayo sab manirado ang Citom sa kadalanan. Busa ang tanang mga modelo nga sakay sa float, ang mga dancer nga mokuyog sa float, ang banda nga isakay sa unang service vehicle, ang mga support personnel lakip na kining tiggunit sa pisi alang cordon sa maong delegasyon kinahanglang tua na staging area mga alas 4 sa kaadlawon.
Sulod sa katuigan, naa kitay heneral nga ideya nga di lalim kining mosalmot isip dancer sa Sinulog parade. Karon pa ko nakaamgo kon unsa gyud kadako ang sakripisyo kon mosalmot sa Sinulog. Samot pa kaha kining mga dagkong mga contingent nga dunay mga dancer nga mga bata.
Mosalmot ra ba gyud ang akong otso anyos nga anak kay usa kintahay siya sa mga fairy sakay sa GT Cosmetics float. Ang mga modelo gipangulohan sa GT endorser nga si Phoebe Kaye Fernandez, ang maanyag sa anchor sa ABS-CBN news. Matod pa, pasalamat kini sa mga tag-iya sa maong kampanya sa natural beauty products nga pure Sugboanon.
Ug kumbinsido na ko nga di igo ang honorarium o ang premyo aron mosakripisyo sa pagpundok og sayo mga alas 4 sa buntag, ug pagpailawom sa init sa adlaw hangtod sa hapon.
Gikinahanglan ang commitment ug ang pagtuo mismo kang Senyor Sto. Niño. Pit Senyor!
MGA TAWO
Matod pa sa Tweet ni Malou Tiquia, usa sa mga mahalon ug inila nga public relations practitioner sa nasud, kinahanglang tagdon gyud sa usa ka kampanya nga mga tawo kining mga bontante. Kon isipon kining way nahibaw-an ug mahimo lang manipulahon, mao kiniy sugod sa kapildihan sa usa ka kandidato.
Dihang nabasa ko kini, ako dayon kining na-relate sa panginahanglan karong adlawa nga tahuron ang relihiyuso nga tradisyon. Kining pagpundok sa minilyon sa kadalanan alang kang Senyor Sto. Niño dili angay gamiton alang sa pamulitika.
Mao nga moawhag na lang ko sa mga politiko nga magpundok sa stage sa Cebu City Sports Center diha sa Abellana National School, ayaw intawon pangampanya. Kining mga politiko nga nagpaluyo nianang Ely Buendia concert diha sa Cebu Coliseum, ayaw intawon pag-gara-gara og paestariray aron dili masuko ang mga nanan-aw. Ana lang.