Codilla nipasakag reklamo sa RPSB

ORMOC CITY – Gireklamo ni Mayor Eric Codilla ang mga sakop sa Regional Public Safety Battalion (RPSB) sa dihang nikuyog sa gihimong barangay visitation ni Kong. Lucy Torres-Gomez didto sa Barangay Cabingtan ning dakbayan pipila ka semana ang milabay.

Matod ni Codilla nga nag-abot ang ilang grupo ug grupo ni Gomez sa naasoyng barangay alang sa usa ka barangay visitation nga gidagsa sa daghang tigpaluyo sa matag partido.

Sa pulong-pulong uban sa mga molupyo, nakurat ang mayor dihang iyang nakita ang panon sa grupo ni Gomez uban sa RPSB.

Iyang gihulagway nga way respeto ang RPSB gumikan kay wa kini mangayog pangatahuran kaniya isip amahan sa lungsod.

Natingala usab si Codilla sa presensya sa RPSB diin matod niya nga wa man untay gikatahong kakuyaw sa lugar.

Gidayeg hinuon sa mayor kon ang tumong sa RPSB ang pagmintinar sa kalinaw apan panghinaut niya nga di lang unta usa ka partido ang ilang kuyogan.

Ang RPSB anaa magbase sa Capoocan, Leyte ug sakop sa grupo ang tibuok Rehiyon 8.

Nunot sa hitabo, nisang-at og reklamo ang mayor ngadto sa buhatan ni Commission on Election (Comelec) Chairman Sixto Brilliantes ug nihatag usab kinig kopya ngadto sa Ormoc City Police Office (OCPO).

Sa pakighinabi sa DyAJ Power 90.3 FM, way duha-duha nga gipadayag ni Codilla ang posibling mahitabo sa iyang reklamo.

“Kahibaw man ko ini nga di gihapon ni maaksyunan akong reklamo pero ako ba lang nga duna lang koy gipa-record,” matod sa mayor.

Ang OCPO pinaagi sa ilang tigpamaba nga si P/ SInsp. Mark Nalda nagkanayon nga nalipay sila sa pakigtambayayong sa RPSB kanila.

Apan, ilang panghinaut nga mananghid lang unta sa ilang buhatan ang grupo kon mosud sila sa dakbayan aron malikayan ang engkwentro.