Nangigi lang
PARA nako, dunay rason nganong nasuko si Kongresista Tomas Osmeña sa paggamit sa sakyanan sa siyudad sa Sugbo sa kampo sa Team Rama, atol sa proclamation rally sa mga kandidato sa pagka senador ubos sa United Nationalist Alliance (UNA).
Kinsa may di masuko ug mangigi nga gibahaan man sa gidaghanan sa mga tawo ang maong kalihukan. Kay sa wa pa ang rally namahayag si Tomas nga way katakos si Rama ug ang kampo sa One Cebu sa pagpundok ug daghang mga tawo.
Sobra sa 50 mil ang ningtambong basi sa pagbanabana sa kapulisan. Gani, ang taho sa ABS-CBN Manila moabot sa 70 mil ang misaksi sa rally. Kini maoy kahay nakapainsulto sa kampo ni Tomas ug sa Liberal Party?
Kung paggamit og sakyanan ang hisgutan, gihimo man sab kini ni Tomas dihang siya pa ang mayor. Mao nay nakangild-ad kay sila ang mogamit okay lang apan kon ang kontra dili maayo.
Mao nga tukma ang editoryal sa Superbalita sa miaging adlaw “weder weder lang.” Kon akoy Tomas, dili siya mamintaha ug mosukol sa away nga patas. Silay nakapabor kay administrasyon sila ug unya mamintaha pa aron apikihon ang kontra.
Akong pagsabot gusto ni Tomas nga mapasakaan na sab og kaso si Rama kay gusto niya nga ipasuspenso. Ang kongresista ang nangunay sa pagkuha og mga dokumento sa paggamit sa mayor sa government vehicle.
Niini bitaw nga kalamboan sa pulitika sa siyudad morag naratol kay di naman mahimutang ang kongresista sa pagpangitag bikil sa mayor. Ang usa sa di nako makalimtan sa gisulti ni Tomas bisan ug di na lang siya mangampanya di gyod makadaog si Mike.
Apan lahi man ang iyang gisulti kaysa iyang gihimo karon. Kay grabi man diay ang gihimong pagpangampanya ni Tomas. Kini ba maoy pagmatuod nga nakurat kay lig-ong kaatbang si Mike alang sa posisyon sa pagkamayor. Ang duha maoy mag-atbang karong Mayo 13 nga eleksyon. Hinuon, anaa ra sa mga botante ug si kinsa ang ilang pilion aron maoy molingkod sa pagkamayor sa siyudad human sa piniliay.
KONSEHAL PE
Nisikat si Konsehal Pe tungod sa kontrobersya nga naglambigit kaniya sa pagbalhin sa south district gikan sa north. Kay matapos naman ang termino ni Konsehal Jun Pe, mao nga halos kada adlaw ang pagsantako kaniya sa radyo, newspaper ug telibisyon.
Ang nakabintaha ni Pe kay gipaburan sa Comelec ang isyu sa term limit. Bisan pa man og gidisqualify ang konsehal sa pagdagan sa south tungod sa kakuwang ug pinuy-anan. Kay sa atong pagsabot sayon alang ni Pe ang pagkuha og temporary restraining order (TRO) kay mahimo man siyang makaapelar.
Ug unya si Pe, anaa nay mansion sa Barangay Guadalupe. Mao nga makaingon ko nga sayop ni sa Comelec. Apan kini hinuong gihimo ni Pe, klaro na sab kaayong nagpabaga ug wa batiag kauwaw kun wa siya makasabot sa gitawag ug delikadesa.
Tiaw moy matapos na ang iyang tulo ka termino sa pagka konsehal sa norte ug unya mobalhin nasab sa south. Ang rason raba kay gustong moserbisyo sa mga tawo. Apan ang sa akong nahibaw-an aron makapadayon sa iyang negosyo. Tinood ni Sir?