RH LAW GIPAHUNONG
Korte Suprema mimando; di pa mapatuman bisan duna nay guidelines kay sa Hunyo pa ang oral arguments
GIPUGNGAN sa Korte Suprema ang pagpatuman sa kontrobersiyal nga Reproductive Health Law nga moepekto unta sugod karong Marso 31, Easter Sunday.
Atol sa en banc session, napulo ka mga mahistrado ang nibotar pag-isyu og 120 ka adlaw nga status quo ante (SQA) order batok sa pagpatuman sa balaod. Samtang lima ka mga mahistrado ang nisupak. Ang mga nibotar mao sila si Associate Justices Presbitero Velasco Jr., Teresita Leonardo de Castro, Arturo Brion, Diosdado Peralta, Lucas Bersamin, Roberto Abad, Martin Villarama Jr., Jose Perez, Jose Mendoza ug Bienvenido Reyes.
Samtang ang mga nisupak naglakip nila ni Chief Justice Maria Lourdes Sereno, Senior Associate Justice Antonio Carpio, Associate Justices Estala PerlasBernabe, Mariano del Castillo ug Marvic Leonen.
Ang oral argument gitakda sa Hunyo 18 sa alas 2:00 sa hapon pagdungog sa habig sa gobiyerno ug sa 10 ka mga petitioner nga nikwestiyon sa constitutionality sa RH Law o Republic Act 10354.
Si Cebu Archbishop Jose Palma ug Dr. Rene Josef Bullecer, country director sa Human Life International pulos nangalipay sa maong kalambuan.
Si Bullecer nitug-an nga nisaad ang arsobispo nga ilang paningkamutan nga sa umaabot nga mga adlaw mapadayon ang kadaugan batok sa balaod.
“God is really with us. We will do our very best in the coming days to sustain our pro life victories,” tipik sa text message ni Palma ngadto kang Bullecer nga giasoy niini sa Sun.Star Superbalita kagahapon.
Si Bullecer nipadayag og kalipay tungod kay ang kamanduan sa Labing Taas nga Hukmanan giluwatan atol sa kapistahan ni San Jose kagahapon nga alang niya usa ka dakong gasa sa adlaw’ng natawhan ni Palma.
Siya nidugang nga pinaagi sa maong kalambuan mas mapalig-on ug mapalapdan nila ang pagkampanya batok sa RH Law ug dili sila mahadlok nga mopadayag og pagsupak batok niini.
“With that development, mas naikag ta nga among i- full blast ang pro-life campaign. Sa 120 days, dako kaayo mi og mahimo ana. We will transform temporary victory into bigger victory,” dugang pa ni Bullecer.
Plano nila nga ikuyog ang pagkampanya batok sa RH Law sa lain nilang kampanya batok sa mga kandidato sa umaabot nga piniliay nga nagpaluyo sa pagpalabang sa balaod ingon man ang pagduso sa kandidatura sa mga kandidato nga ningsupak sa balaod.
Si Presidential spokesperson Edwin Lacierda niingon nga gitahod sa Malacañang ang desisyon sa Korte Suprema.
Kompiyansa sila nga mapanalipdan ang mga merito sa balaod bisan og gipugngan sa SC ang pagpatuman niini sud sa upat ka buwan.