4 KA ARMADONG MGA TAWO NASIKOP SA RAID SA RESORT

UPAT ka gidudahang mga gun-for-hire nasikop ug nakuhaan og daghang high powered firearms sa pagronda sa mga sakop sa Regional Special Operation Group (RSOG-7) sa Regional Intelligence Division (RID-7) alas 11:45 sa gabii niadtong Miyerkules sa Dubay Beach Resort sa Barangay Dumlog, dakbayan sa Toledo.

Ang ilang amo nga si Roldan Cansancio, negosyante, nga maoy subject sa search warrant, wa diha atol sa ronda.

Sila si Chief Insp. George Ylanan, hepe sa RSOG-7 ug mga kauban ni- serve sa search warrant nga giisyu ni Judge Hermes Montero sa Regional Trial Court (RTC7) Branch 9 sa dakbayan sa Toledo nga gipitsahan niadtong Marso 18, 2013.

Gipusasan sila si Ritchie Suarez, 33, minyo, taga San Carlos City, Negros Occidental; Lucio Yuson, 23, ulitawo, taga Villahermoso, Negros Oriental; Cesar Paragoso, 70, minyo, taga Lutopan, dakbayan sa Toledo; ug Joey Lascuña, 40, taga Barangay Cangbang-og, dakbayan sa Toledo.

Ang upat nakuhaag high powered firearms nga naglangkob sa usa ka M14 rifle, 12- gauge shot gun, Thompshon sub-machine gun, usa ka M4A1 Carbine, usa ka 9mm pistol, 357 caliber revolver, .38 caliber revover, usa ka kalibre .45 nga pistola, usa ka KG-9 submachine pistol, usa ka granada, nagkada-iyang magazine ingon man daghang mga bala sa armas.

Ang mga suspek hugtanong nanghimakak sa pasangil nga sila mga gunhire sila sanglit igo lang silang nagbantay sa beach resort ni Cansancio.

Si Cansancio gikatahong gawas nga dunay daghang mga balay ug resort, duna say farm diha sa dakbayan sa Toledo.

Si Yuson niingon nga daghang mga pagpangawat hinungdan nga sila gipabantay ug giswelduhan og P500 matag semana.