Pulitika gidudahang rason nga silot sa kapitan gipamub-an
PULITIKA ang nakita nga hinungdan ni Provincial Board Member Sun Shimura kon nganong giminosan sa iyang mga kauban sa Provincial Board ang suspension batok ni Bakhawan Barangay Kapitan Bernardito Luche Jr sa lungsod sa Daanbantayan.
“Klaro kaayo! Nakita man gyud namo gahapon (Lunes) nga this is really politics,” siya nagkanayon dihang nahinabi sa mga tigbalita kagahapon.
Gikan sa duha ka tuig nga maoy silot nga gipahamtang sa Sangguniang Bayan sa lungsod, gihimo na lang nga tulo ka buwan ang suspension sa kapitan base sa gipahigayon nga botasyon sa PB atol sa ilang regular session niadtong Lunes diin ang mga bokal nga mga sakop sa Liberal Party ug mga kaalyado maoy nidominar.
Si Luche, kandidato pagka konsehal sa lungsod sa umaabot nga piniliay ubos sa LP diin nahisakop usab o mga kaalyado ang mayoriya sa mga bokal.
Ang mga bokal nga nibotar nga minosan ang suspension mao sila si Peter John Calderon, vice chair sa committee on complaints and investigation sa hunta; Wilfredo Caminero; Arleigh Jay Sitoy; Carmen Remedios Meca; Miguel Antonio Magpale, Jude Thaddeus Sybico ug Thadeo Ouano
Si Shimura, anak ni Daanbantayan Mayor Ma. Luisa Loot nipadayag og kasagmuyo bahin niini tungod kay alang niya klaro kaayo nga gituis sa kapitan ang balaod.
“Nganong ato man ning inganion nga it’s really unfair sa Sangguniang Bayan nga sila bitaw ang nagpatay og imbestigar sa nahitabo,” matod niya atol sa 888 News Forum sa Marco Polo Plaza.
Gawas nga gipagaan ang suspension, ang ruling ni Calderon nimando usab nga bayran ang kapitan sa mga buwan nga siya gisuspenso nga nilapas og tulo ka buwan samtang nagungong pa ang iyang apilar sa PB.
Si Shimura nibutyag nga moduso og motion for reconsideration ang mga sakop sa konseho sa Daanbantayan sa maong ruling sa PB.
Siya nagtuo nga magubot gyud ang Barangay Bakhawan kon molingkod na dayon og balik si Luche sanglit duna pay laing legal remedies ang SB sa Daanbantayan nga magkwestiyon sa desisyon sa PB.
Ang committee on complaints and investigation nga gipangulohan ni Bokal Joven Mondigo niduso og duha ka managlahing rekomendasyon: ang usa nagsagop sa desisyon sa konseho sa munisipyo nga nagpahamtang og duha ka tuig nga suspension batok ni Luche.
Samtang ang ikaduha nga gipaboran nila ni Calderon, Sitoy, Caminero ug Meca, nipakunhod ngadto sa tulo ka buwan ang suspension.
Si Luche gipasakaan og grave abuse of authority, oppression, serious misconduct ug gross dishonesty sa barangay konsehal nga si Veronico Espinosa sa konseho sa Daanbantayan gumikan sa pagsakmit niini sa mga pinutol nga gemelina trees nga way pagtugot.