Lagundi reef wa pa gyud ma-rehab sukad sa sangad

SUKAD nasangad ang usa ka langyawng barko sa kadagatan sa Barangay Poblacion, dakbayan sa Talisay niadtong 2009, wa pa gyud marehabilitate ang damage sa Lagundi reef.

Ang Lagundi reef, tulo ka ektarya nga marine protected area giingong nataligaman na lang human ang mv Majuro nakaguba sa daghang mga coral.

Sa wa pa matapos ang session sa konseho kagahapong adlawa, si Konsehal Danny Caballero nangutana sa chairman sa committee on environment nga si Konsehal Bernard Odilao kon unsay update sa rehabilitation sa Lagundi.

Gipahinumdoman ni Caballero ang konseho nga niadtong 2011, gibabagan ang iyang resolusyon nga butangan unta og mga boya ang Lagundi aron pabiling mapreserbar ang lugar .

Nipasar sab og resolusyon si Odilao nga gamiton ang $10,000 nga gibayad sa mv Majuro alang sa rehabilitation sa Lagundi apan wa kini mahitabo.

Si Bise Mayor Alan Bucao nga maoy presiding officer nipasalig ni Caballero nga anaa pa sa trust fund ang maong kantidad.

Isip usa ka lisensyado nga diver, si Caballero nagplano sa pagsawom sa Lagundi reef aron susihon kon unsa ang tinudanay nga kahimtang sa ilawom sa dagat human masangad ang MV Majuro.

Niadtong 2006 , ang Lagundi reef gihatagan og atensyon sa pangulo sa Tourism committee nga si kanhi Konsehal Shirley Belleza ug giluwas kini gikan sa mga mangingisda nga naggamit og dinamita.

Si Belleza maoy nangulo sa rehabilitation Lagundi reef uban sa mga iladong divers nga nihulagway sa underwater garden tungod sa kadaghan sa mga himsog nga nagkalainlaing klase sa corals.