Lucy Gomez gitaktak isip congresswoman
GITANGTANG sa Korte Suprema kagahapon sa iyang katungdanan si Kong. Lucy Torres-Gomez human nasutang ilegal ang iyang pagpuli niya sa iyang bana nga si Richard niadtong piniliay sa 2010.
Ang desisyon sa labing taas nga hukmanan nipabor sa writ of quo warranto kon legal nga paagi aron tangtangon ang tawo gikan sa publikong katungdanan nga gisang-at sa naparot nga kandidato nga si Silverio Tagolino kinsa nakaangkon lang og 493 botos batok kang Gomez nga may 101,250 botos sa ika-upat nga distrito sa Leyte.
Ang abogado ni Gomez nga si Alex Avisado namahayag nga nasurprisa sila ug nabalaka sa desisyon apan moapelar sila niini kon makadawat silag kopya sa desisyon nga gihimo ni Associate Justice Estela Perlas-Bernabe.
Matod ni Avisado nga ang Korte Suprema nibasura niadtong Hulyo 2012 sa samang petisyon nga gisang-at sa kaatbang ni Gomez nga si Eufrocino Codilla Jr. batok sa napakanaog nga desisyon sa House Representatives Electoral Tribunal (HRET) nga balidong nagdeklarar niadtong Marso 22, 2012 sa iyang kandidatura ug sa mga boto nga iyang naangkon isip nipuli nga kandidato.
“We humbly believe this is a serious and reversible error. In the meantime, Congresswoman Lucy shall continue to discharge her duties as the duly-elected representative of the fourth district of Leyte. We are confident that in the end, justice shall be served only to those who deserve,” pahibawo niya sa Sun.Star.
Ang nibotar sa pagpataktak kang Gomez nilangkob nilang Chief Justice Maria Lourdes Sereno, Senior Associate Justice Antonio Carpio uban silang Justices Martin Villarama, Jose Perez, Bienvenido Reyes, Marvic Leonen, ug Bernabe.
Nisupak silang Justices Teresita Leonardo-de Castro, Mariano del Castillo, Roberto Abad, ug Jose Mendoza samtang silang Justices Presbitero Velasco Jr., Arturo Brion, Diosdado Peralta, ug Lucas Bersamin wa moapil niini kay mga sakop sila sa HRET.
Ang HRET kaduha mopabor sa pagpili kang Gomez apan si Tagolino nipaabot niini sa Korte Suprema diin nagtuo nga imbalido ang pagpuli niini kang Richard kay ang certificate of candidacy niini gikanselar nunot sa kapakyas sa pagtuman sa rekisitos diin gikinahanglang mopuyo siya sa dapit sud sa usa ka tuig.
Nalatid kini sa desisyon nga gipadala sa mga tigbalit gikan kang SC Public Information Office chief Theodore Te.
“Lucy Torres could not have validly substituted for Richard Gomez because he could not have been considered a candidate within the ambit of the Election Code because he was held ineligible for failure to comply the residency requirements. Thus absent valid substitution, Torres-Gomez could not have been considered a candidate,” nagkanayon ang Korte Suprema.
Si Gomez magpasubli sa piniliay karong Mayo samtang ang iyang bana magpapili sa pagka-mayor sa dakbayan sa Ormoc.