Notadong pusher ug snatcher tiklo

ORMOC CITY - Sunodsunod nga pagpamusil ang nahitabo ning dakbayan sud sa usa ka semana diin patay ang giingong usa ka notadong tigpayuhot og drugas ug usa ka notadong snatcher.

Niadtong adlawng Biyernes, gipusil patay ang biktimang si Dennis Abellana, 42, ug molupyo sa barangay Naungan ning dakbayan.

Ang imbestigasyon sa kapulisan nagtumbok nga dunay duha ka testigo ang nibutyag nga may duha ka motorsiklo nga dunay nagsakay nga lalake ang ilang nakita didto sa Toog Highway diin nahitabo ang pagpamusil apan wa nila makuha ang plate number.

Nabati usab sa duha ang sunodsunod nga buto sa pistola ug didto nila nakita ang patayng lawas sa biktima nga naligo sa iyang kaugalingong dugo nga nagbuy-od sa kasagbotan nga bahin.

Nakuha gikan sa crime scene ang 16 ka kabhang sa gituhoang kalibre .45 ug duha niini ka slug.

Sa gihimong pakisusi sa kapulisan, nasuta nga si Abellana adunay gi- recruit nga usa ka 16 anyos nga babaye sa Tabango ug gidala ning dakbayan aron patrabahuon.

Apan, ang amahan sa babaye nga si Roel Tamayo niadto sa Station 1 aron itaho nga wa na mopauli ang iyang anak ug wa na siya masayud og asa kini.

Samtang, ang igsuon sa biktima nga si Junjun Abellana nibutyag sa kapulisan nga usa ka notadong snatcher ang iyang igsuon ning dakbayan ug sa ubang lugar hinungdan nga di nalang sila moreklamo gumikan kay nasayod na usab sila nga mao ra usab kini ang dan- gatan sa iyang igsuon.

Padayon karong gipangita sa kapulisan si Roel Tamayo kinsa gituhoang maoy nagpaluyo sa kamatayon ni Abellana. Gani, nikontak ang kapulisan sa cellphone ni Tamayo nga nihatag sa iyang number atol sa iyang pagdangop sa kapulisan.

Sa laing bahin, patay ang usa ka kawani sa lokal nga kagamhanan sa Kananga kinsa giingong notadong tigpayuhot og drugas samtang naangol ang drayber sa gisakyan niining traysikol human pamusila sa upat ka wa mailhing mamumuno didto sa World Vision sa Barangay Tambulilid niadtong Dominggo sa kaadlawon.

Ang namatay giilang si Mario Aligway alyas Boboy, 41, usa ka sakop sa Civil Security Unit (CSU) ug nagpuyo sa barangay Valencia ning dakbayan kansang pangan nalatid sa watchlist sa kapulisan nunot sa pagpayuhot og gidiling drugas.

Matod sa kapulisan sa Station 3 nga nagpakyaw og traysikol ang biktima gikan sa Barangay San Pablo padung sa Tambulilid ug pag-abot sa World Vision nakabantay ang drayber nga si Romulo Zamora nga may puti nga sakyanan ang nagsunod kanila.

Gipamusil ang traysikol ug punterya niini si Aligway ug naigo sa iyang bukton ug ulo ang drayber apan luwas kini samtang ang biktima nakit-an nalang sa kapulisan nga naglutaw sa usa ka sapa nga duha ka samad sa dughan ug usa sa walang bahin sa lawas.

Way nakuha nga kabhang sa bala ang kapulisan ug padayon sila nagsusi kon si kinsa ang responsable sa krimen.