2 ka tinun-an sa Grade 5 armado sud sa eskuylahan

DUHA ka mga grade 5 nga mga tinun-an ang gipapyansa og $100,000 matag usa human sila gipasakaan og kasong panagkunsabo sa pagpamatay sud sa ilang tunghaan sa Washington.

Ang mga bata nga nag-edad og 10 ug 11, gipaabot nga ikiha sa juvenile court og conspiracy to commit first-degree murder, possession of a firearm ug witness tampering tungod sa pagdala sa armas ug kutsilyo sa eskuylahan ug nanghulga sa ilang mga kauban.

Ang duha nga tinun-an sa Fort Colville Elementary School gikustodiya na karon sa kapulisan human sila makuhai ug pistola ug kutsilyo.

Atol sa interview, nasuta sa kapulisan nga ang mga bata desidido gyud nga mogamit sa maong mga armas.

Si Stevens County Prosecutor Tim Rasmussen nagkanayon, “these young men conspired to kill. It was interrupted by the bravery of a fourth grader who saw something and said something ... and interrupted a murder.”

Ang Colville School District Super- intendent nga si Michael Cashion nagkanayon nga nadiskubrian ang plano sa duha sa wa pa magsugod ang klase niadtong Biyernes.

“We’ve been told that the boys had a plan to kill an ex-girlfriend ... and harm other students. There was no list, but names were given to the police,” matod ni Cashion

“I can’t get my mind around it,” matod niya.

Atol sa husay niadtong miaging semana, si Deputy Stevens County Pros- ecutor Lech Radzimski nihangyo sa huwes nga manduan ang duha nga dili magpaduol sa walo ka mga bata nga nailhan lang sa ilang initials.

Si Fort Colville Elementary Principal, Clayton Allen nagkanayon nga ang tanang mga biktima, pulos ilang kauban sa klase sa 5th grade.

Ang huwes nitakda sa laing hearing aron pagtimbangtimbang kon ang mga linghod pa kaayo og pangidaron nga mga bata, makahunahuna na ba sa pagpamatay.