Habemus papam
SA tumoy sa paghuwat gihatag ang bag-ong Santo Papa taliwa sa kadasig ug kamaya sa linibo ka mga deboto. Pagkahilis sa puting aso nagpatim-aw si Papa Francis nga sul-ob ang puting sotana di sa magilakong roba.nga timailhan sa dungog ug gahom.
Gipakita niya, ang simple niyang kinabuhi, nga way pagkausab bisan siya Santo Papa na. Nahibaw-an nga gikan sa iyang pagka pari hangtod nga Arsobispo na siya sa Buenos Aires, Argentina, gipuy-an niya ang yanong kinabuhi.
Wa mopuyo sa Palasyo sa Arsobispo, siya nagabang lang og apartment. Siya kusinero sa kaugalingon niyang pagkaon. Mosakay lag tren kon molangyawg mga lagyong dapit.
Gisunod niya ang pahimangno ni Hesukristo sa katawhan ang pagkamaubsanon.
Kay sa Iyang panahon dinhi sa kalibutan, ang Diyos yano ra kaayo nga maglakaw-lakaw lang sa abugong dalan sangko sa dapit nga adto siya magwali.
Mao nang sayon rang gipili ni kanhi Jorge Maria Cardinal Bergoglio, ang titulo nga Pope Francis ang ngalan ni St, Francis de Asisi nga nagsilbi sa mga kabos ug dinaugdaog sa buhi pa dinhi sa kalibutan.
Di pagasabton nga ang nangaging mga Santo Papa di mapaubsanon ug maki-kabos. Gibuhi lang niya sa iyang liderato karon ang ehemplo sa kayano ni Hesukristo.
Sama sa ubang Santo Papa ang sentro sa iyang pagka Papa mao si Hesukristo. Ang nakalahi lang kay si Pope Francis nagpakita nga iyang gituman ug gibuhat ang iyang gipanumpaan sa pagka kabos (vow of poverty).
Ning iyang kinaiya daghan ang matandog labi na ang atong kaparian. Gipaabot nga daghan unya ang mangausab. Masilsil man sa ilang hunahuna ang gibuhat sa labing labaw sa Simbahang Katuliko.
Di man lisod ang pagpaubos. Kon naa ang diwa sa gugma ug pagtahod sa isigkaingon mosunod man dayon ang pagpaubos. Apan kon pagpakaaron-ingnon lang naa kanunay ang pagpataas, matod ni San Agustin.
Tungod sa diwa sa pagkamaubsanon si San Pedro, unang Sato Papa, nihangyo nga tuwaron siya sa pagbitay kay wa pa kuno siya kasunod sa mga lakang sa iyang amo nga si Hesukristo.
Si Mother Teresa sa Calcutta nagpuyo kaniadto sa pagkamaubsanon dihang gibiyaan niya ang kadato sa iyang mga ginikanan ug gipuy-an ang lisod nga kinabuhi uban sa mga kabos.
Kini si Pope Francis ikaduha sa miaging conclave sunod kang Pope Benedict XV1. Wa masayop ang mga cardinal pagpili kaniya gibanwagan sila sa silaw sa espiritu santo.