‘SQA’ sa RH law

ANG mga ahensya sa kagamhanan gipugngan sa Supreme Court (SC) sa pagpatuman sa kontrobersyal nga Reproductive Health (PH) law nga gikatakda nga moepekto na unta karong Easter Sunday, Marso 31.

Si SC Public Information Office chief Theodore Te nagkanayon nga ang SC niluwat og “status quo ante (SQA) order,” diin nagsanta sa usa ka nag-ung-ong nga ruling apan, kini giluwatan alang sa preserbar sa status sa petisyon nga naa sa taas nga hukmanan.

Gikataho nga napulo ka justices ningbotar pabor sa SQA samtang nisupak si Chief Justice Maria Lourdes Sereno uban ni Senior Associate Justice Antonio Carpio ug Justices Mariano del Castillo, Estela Perlas-Bernabe, ug Marvic Leonen.

Dihang napasar ang RH law sayo ning tuiga, ang kampo sa simbahang Romano Katoliko nipasaka dayon og petisyon sa SC sa pagsanta sa balaod.

Walay paglurang ang duha ka kampo, supak o uyon sa RH law, sa pag-abante sa ilang interes. Apan, hangtod kanus-a ang pagpakigbatok sa RH law? May kahigayonan ba kaha nga mausab pa kini?

Ang pagluwat sa SQA sa RH natayming sa pormal nga instalasyon sa bag-ong santo papa, Pope Francis, kagahapon sa Vatican City isip pangulo sa 1.2 bilyunes nga Katoliko sa kalibotan. Naila ang bagong Papa nga konserbatibo ug supak sa artipisyal nga pagkontrolar sa pagpanganak.

Busa, maisip nga ang SQA usa ka pagyukbo o regalo sa bag-ong Papa alang sa iyang adlaw.

Mayoriya sa populasyon sa Pilipinas, bugtong Kristiyanong nasod sa Asya, sakop sa simbahang Romano Katoliko apan daghan usab ang giingong mga sakop sa simbahan ang pabor sa RH law.

Ang away sa korte bahin sa RH law positibo nga ehersisyon sa demokrasya.