Gipalamian lang?
PARA nako, gipalamian lang ni Kongresista Eduardo Gullas sa unang distrito sa lalawigan sa Sugbo si Junjun Davide atol sa usa ka dakong kalihukan sa siyudad sa Talisay dihang naghisgot ug midayeg sa pagkatawo niini.
Giklaro ni Gullas human sa kalihukan nga wa niya talikdi ug nagpabilin ang iyang suporta sa kauban nga kongresista nga modagan sa pagka gobernador sa Sugbo nga si 3rd district Congressman Pablo John “PJ” Garcia.
Kini hinuon si Gullas dunay dakong utang kabubut-on sa agawon ni Davide nga si Kongresista Tomas Osmeña dihang gihatagan og gatusan ka milyon ka pesos alang sa proyektong inprastraktora sa iyang distrito.
Apan mas dako ang mga proyekto sa distrito ni Gullas nga gihatag sa igsuon ni PJ nga si Gobernador Gwen Garcia. Gani, ang mga mayor ug kapitan mas una pang mipadayag sa ilang suporta sa kandidato sa One Cebu sa pagka gobernador ug bise gobernador.
Kaniadto si Gullas ug Osmeña, nagkasungi tungod sa parte sa yuta sa South Road Proerties ( SRP). Gipasanginlan ni Tomas si Gullas nga land graber. Gani gipatangtang ni Tomas ang mga trabahante sa Cebu City hall nga taga Talisay ug taga Minglanilla, kay matod pa niya nga problema na ni Gullas ang paghatag kanila og trabaho kay sakop man sa iyang distrito.
Karon mitumaw ang mga pangutana, motuman ba si Gullas sa iyang mga saad? Si Gullas usa ka seasoned nga pulitiko ug dunay higayon nga napakyas sa pagtuman sa iyang saad. Kini maoy atong paabuton.
PATAY NA SI TATAY
Halos di namo madawat ang kalit nga kamatay- on sa among amahan nga si Cipriano B. Lonzon tungod kay himsog pa ang iyang panglawas bisan pa man sa iyang pangidaron nga 83 anyos. Gawas sa high blood ug prostate cancer, lig-on pa kini.
Mao lagi dinhi sa yuta wa man gyoy magdugay. Bisan gani ang bato matunaw man sa tinulo sa tubig. Sama sa kinabuhi sa tawo sa usa lang ka pagpamilok kalit lang nga mahanaw. Kay ang atong kinabuhi dinhi sa yuta hinuwaman lang, ang kahitas-an ra maoy mokuha niini. Tungod niini, amo nang nadawat ang kalit nga kamatayon ni Tatay.
Magpasalamat sab kaming iyang mga anak nga sila si Nathaniel Lonzon, Avelina Lonzon Batulan, Jerson Lonzon, Joel Lonzon, Sherlina Lonzon Banzon, Roselita Lonzon ug Efren Lonzon, sa moral nga suporta sa mga tawo nga among higala ug ilabi na si Mama Lucena Lonzon, asawa ni Tatay.
Si Tatay namatay sa cardiac arrest niadtong Marso 14 pila ka adlaw human nagsaulog sa iyang ika-83anyos niadtong Marso 10. Ang iyang haya anaa karon sa iyang pinuy-anan sa 1358 Ilaya, Danao City, ug ilubong karong Sabado, Marso 23, alas dos sa hapon.
Ako lang pahinumdom nga atong panggaon ang atong mga ginikanan. Si Tatay, usa ka modelong amahan nga naggiya sa iyang pito ka mga anak aron mahimong propesyonal ug nagtuman sa mga pulong Dios aron mahalikay sa pagpakasala. Tay, maayo nalang nga pagpahuway kay nakasiguro ang imong asawa, mga anak, apo, igsuon, kaliwat ug mga kaila nga sa langit karon ang imong gipuy-an wa nay kasakit ug pag-antos kay pulos naman kalipay.