Pamahayag ni Msgr. Dakay
SUBLING nakontrobersiyal si Msgr. Achilles Dakay, ang tigpamaba sa Archdiocese Sa Sugbo gumikan sa pamahayag niini nga kuwang siya ug pagtuo sa nanggawas nga mga balita mahitungod sa mapaubsanong pamatasan sa bagong Santo Papa nga nagdala sa iyang bag-ong ngalan nga Pope Francis kon Papa Francisco.
May mga wala nahimuot sa pamahayag ni Dakay nga dili siya kombinsido nga si Papa Francisco nagsakay lang og tren kauban sa mga yanong tawo og bus de pasaheroan sa iyang biyahe, nangunay ug luto sa kaugalingon niyang pagkaon ug nagpuyo sa simple nga apartment sa dihang nagsilbi pa nga Arsobispo sa Buenos Aires sa Argentina.
Mas makakurat ang pamahayag ni Dakay sa iyang pag-ingong sobra ra kaayo kon silang mga pari way kaugalingong sakyanan ug mosakay lang og Ceres bus.
Human nakamatikod si Dakay sa pagsaway, siya miingon nga nasaypan lang sa mga tigbalita ang iyang pamahayag. Apan wala nakapatin-aw ug sakto si Dakay kon sa asa mang dapita nga nasayop ang mga tigbalita sa pagkutlo sa iyang pamahayag?
Katingad-an man god ang iyang pamahayag nga sama niya nga dili lang kay pari ug Msgr. apan mao pay nagsilbing mensahero sa kinatibuk-an nga Archdiocese sa Sugbo.
Dili pirmirong higayon nga nakontrobersiyal si Dakay tungod sa iyang mga pamahayag. Daghan usab sa mga tigbalita ang nakatagamtam sa pagka insultador niini. Kung magkinto kaniya ang mga tigbalita, unsa na kaha ang labing yanong mga tawo?
Ang hagit ni Papa Francisco nga ipaduol ang simbahan sa katawhan usa ka butang nga dalaygon. Gihimo kini ni Papa Francisco sa dihang siya Cardinal pa sa Argentina diin iyang gibisita ang mga nawadan nag paglaom nga mga masakiton ug gani adunay mga hulagway nga iyang gipanghusan ang ilang mga tiil ug gihawkan.
Ang hagit pagpaduol sa simbahan sa katawhan, mahimo kaha sa Archdioses sa Sugbo kung ang kalidad sa tigpamaba niini adunay kakulian? Labing maayo nga hinuktukan ug maayo ni Cebu Archbishop Jose Palma kung unsa nga ministry sa simbahan ang haom ni Dakay. Kanang ministry nga makatabang gayud siya sa mga magtutuo ug dili makapahisalaag hinuon niini.
Kung sa panahon ni Kristo aduna nay luho nga sakyanan nga BMW, mosakay kaha siya niini sa iyang pagsangyaw? Nahinumdom kaha si Dakay sa nasulat sa Bibliya nga gipili ni Kristo ang pagpakatawo sa pasungan bisan niadtong higayona aduna nay mga hospital?
Ang mga magtutuo nga nagbasa sa Bibliya makapamalandong sa giingon niini, ”Ang tibuok Kasulatan gisulat uban sa lamdag gikan sa Diyos ug mapuslanon kini alang sa pagtudlo sa kamatuoran, sa pagbadlong, ug sa pagsaway, ug sa pagtudlo sa pagkinabuhing matarong” (2 Timoteo 3: 16).