Pangamuyo ngadto sa DENR

ANG Barangay Baye, Asturias, Sugbo usa ka bukirang bahin sa lungsod. Sa tibuok Asturias, ang Baye maoy giila nga timberland area kay anha diha gipangtanom ang tanang matang sa mga kahoy gikan sa dakbayan sa Sugbo.

Ang timberland area gidumala ni Engr. Luciano Cabag-iran nga maoy giisip nga ARWP project manager uban sa iyang mga sakop nga sila si Engineers Arnold Omandam, Servando Algunas ug Rey Maambong.

Malampuson ang pag-ugmad sa timberland bisan sa hulga sa mga sakop sa nagpailang New Peoples’ Army (NPA). Ningpadayon sila sa ilang mga gimbuhaton kay matod nila nanarbaho lang sila alang sa ilang pamilya. Wa sila mangabuso sa katawhan.

Matag tuig, ang gobiyermo mohatag og P20,000 ngadto sa P50,000 ngadto sa mga mag-uuma aron atimanon ug palambuon ang mga kahoy nga gipangtanom. Kon ang mga kahoy mohingkod na, anihon kini paglabay sa 10 ka mga tuig uban sa kasabutan nga ang mga mag-uuma modawat og 70 porsiyento, samtang ang iya sa gobiyerno 30 porsyento.

Ang mga kahoy gitanom niadto pang 1998. Mga 15 ka tuig na ang nakalabay. Apan ang kagamhanan wan a magtagad niini. Makatulo na kami nibisita sa buhatan sa Dept. of Environment and Natural Resources (DENR) sa dakbayan sa Toledo, apan igo ra ming gipangsaaran.

Sangpiton ko sila si Engr. Cabag-iran, Engr. Richard N. Abella nga maoy officer-in-charge sa Provincial Environment and Natural Resources (PENRO) ug si DENR Executive Regional Director Augustus L. Momongan nga hatagan kini og pagtagad.

Manghinaut kaming hingtungdang mga maguuma nga patalinghugan kining among pangamuyo tungod sa among kawad-on. Hinaut unta nga lamdagan sa Kahitas-an ang hingtungdang mga opisyal.