FB friend ni Lolo
MOBAKASYON sa Pilipinas ang apo ni Lolo Tokbing, si Yen-Yen, nga atua magtrabaho sa Amerika isip nars.
“Duna koy sinugatan nimo, Lo. Imported nga jogging pants, brief supporter, sapatos, sando, ug mga gamit pang-ehersisyo. Ikuyog kanunay inig jogging mo si Lola Belding, ha? Aron mahibalik ang kanhi ninyong sweetness!”
Wala masayod si Lolo Tokbing nga kanunay mosumbong kang Yen-Yen pinaagi sa long distance call ang iyang kapikas nga si Lola Belding. “Dili na gyud sweet nako ang imong Lolo Tokbing. Dili na man gani ko niya haplas-haplasan ug hilot-hiluton, Day Yen-Yen!”
“Sagdi lang, Lola. Duna koy nahunahunaan. Mahibalik da lagi ang sweetness ninyo ni Lolo sama sa panahon nga pareho pa mong mahiligon sa athletics.”
Sa pagbakasyon ni Yen-Yen nadawat ni Lolo ang gisaad nga mga sinugatan niini. Apan maayo ra to sa sinugdanan. Ning ulahing mga buntag, tuyuon gyud ni Lolo Tokbing nga paspasan ang iyang pag- jogging. Dili na walkathon, dili na lakaw-lakaw lang. Gusto niyang mabiyaan si Lola Belding didto sa oval.
“Malangan kos akong jogging kon magsige kag kuyog-kuyog, Ding!”
Walay nahimo si Lola Belding. Mitug-an kang Yen-Yen sa long distance, “Kanunay kong biyaan ni Lolo nimo. Daghan man gong dalaga nga magjogging pod sa oval. Mga puti pa gyug legs. Kon kanus-a nag-62 anyos kanang imong Lolo, mao na man hinuoy pagpanguwag!”
“Sagdi lang, Lola. Duna pod koy nahunahunaan. Atong putlon ang pagka chicks adaret ni Lolo,” tubag ni Yen-Yen.
Aron ma-bisi si Lolo Tokbing gipatukoran kinig Internet Café ni Yen-Yen. Gidili dinhi ang research work kay aron walay mga dalaga nga college student ang makasulod.
Mga bata ra gyud ang puyde. Ug exclusive ra sa video games. Apan misamot ang problema kay si Lolo Tokbing kanunay nang mabuntagan sa Internet café. Nagpatudlo ni sa usa ka bata unsaon pagregister sa Facebook. Ang iyang FB profile kay retrato sa kanhi aktor nga si Pancho Magalona sa batan-on pa nga iyang nahipos. Adonis Montenegro ang gigamit nga ngalan ni Lolo Tokbing, 25 anyos kuno ang edad. Ug gidako niya ang mga letrang COMPLICATED sa iyang status, aron ingnong sawimpalad siya sa gugma.
USA ka buntag niana samtang nakig-chat si Lolo Tokbing sa gikabuangan niyang si Lavina del Mar, 24 anyos, ug atua magtrabaho sa New York.
Lolo Tokbing: Kanunay gyud kong magtutok ning imong picture sa Facebook, Lavina. Pagkaanyag nimo sa imong bikini, uy! Bigot kaayo kag lawas. Imo ba gyud ning retrato or char-char lang? Anyway, I love you true, Lavina.
Lavina: Nahadlok ko, Adonis. Basig aduna kay laing hinigugma.
Lolo Tokbing: Wala, uy! Pikasa pa ang akong dughan ug ikaw ra gyuy akong pakamatyan. Dinhi ning kasingkasing ko, ikaw ra gyuy nahikulit sa lapida sa akong gugma. Bisag tulion pa ko nimo pag-usab, ikaw ug ikaw ra gayud, Lavina.
Lavina: Sige, Adonis, ha? Tulion jud tika pagusab kon di tinuod nga ‘Complicated’ kanang imong love status.
Nagkasabot silang mag- eyeball inig-abot ni Lavina sa Pilipinas. Apan dili una mopakita si Lolo Tokbing. Iya unang klaruhon kon tinuod ba gayud si Lavina del Mar.
Mi-teks niya si Lavina: “red akong t-shirt ug kalo. Her na kos SM, atubangan mang inasal. wer na u adonis?”
Pagkakita ni Lolo Tokbing sa maong babaye, midali siyag pasalipod sa guwardiya sa atubangan sa Mang Inasal. Ug gikulbaan siya pag-ayo samtang mihagawhaw, “Tulion gyud kog usab sa akong apo ini! Si Yen-Yen man diay si Lavina!”
(KATAPUSAN)