Let my feelings out
(Ikatulo sa pito ka mga gula)
NAGTUPAD mi si Dina sa paglingkod, si Lorna ug Sharmain nagtupad sab paglingkod sa among atbang. Klaro sa ilang tinan-awan nako nga nahibulong sila sa akong kahilom. Kasagaran gud, kon ingon aning nagsakay mi pauli sa Danao, alegre kaayo mi. Bisag unsa lang ang among estorya. Magkinumedyahay mi. Magpalabwanay og mga jokes. Usahay gani green jokes na ang among isulti.
Sa among kaalegre, malingaw sab ang ubang mga pasahero nga among ikasakay. Pero karon, wa ko moapil sa kaalegre nila ni Dina, Lorna ug Sharmain nga nag-estoryahay. Gisiko kog hinay ni Dina. “Naunsa ka ba, Carla? Di bagay nimo ang lonely face, uy!” Gikiloan ko ni Dina. Igo lang kong mingislo. Wa ko siya tubaga. Hangtod nga nahiabot mi sa Danao. Alas siyete ming miabot. Dug-ol ra ang among mga balay. Nagkasabot mi nga manihapon sa suki namong kan-anan sa merkado sa di pa mi mamauli. Naghilom gihapon ko samtang nagkaon ming upat. “Haayyy nimo, Carla. Mora ka mag nagpas-an sa kabug-at sa kalibotan.”
Nakatan-aw ko kang Lorna. Miseryuso sab siya, mao sab sila si Dina ug Sharmain. “Nabag-ohan gyud mi nimo. Carla.” Mitan-aw og dugay si Dina nako. Miinom ko sa akong drinks. Gitan-aw ko si Sharmain. Gitutokan ko niya. “We’re bestfriends, Carla. Sultihi mi sa imong problema, uy!” “You know, friends, nahunahuna man gud nako nga pagkalisod sa atong sitwasyong upat, uy. Na- in-love ta sa usa ka lake. Ug aron tulo na lang mo nga naghuwat sa pagpangulitawo ni Jhead, let my feelings out.” Nakasulti gyud ko sa akong gustong mahitabo.
Nagtinan-away sila ni Lorna, Sharmain ug Dina. Unya mitanaw silag dugay nako. “Seryuso ka ba, Carla? Morag di katuhoan na da!” “Bitaw. Way atrasay, uy!” “Kadali sab nimong mangluod, uy!” Sa reaksyon sa tulo, klaro nga wa sila motuo nako. Pero sa sige kong pasabot nila, mituo na sila.
“Aw, mao man kaha. Sige gud. Tulo na lang ming pilian ni Jhead.”
Mikidhat si Dina kang Lorna ug Sharmain. Miyangu-yango ang duha ug mibawos pagkidhat kang Dina.
Kadto ang sinugdanan nga wa na ko maghunahuna nga pangulitawhan ni Jhead. Gusto ko nang mo- concentrate sa akong studies.
(SUMPAYAN)