Ang bag-ong lagda sa UAAP

NIDALIKYAT og balik dinhi sa Sugbo niadtong Dominggo ang Cameroonian nga si Ben Mbala, kanhi pambato sa SWU Cobras nga atoa na karon sa De La Salle University sa Kaulohan.

Usa man gud siya sa mga gipasidunggang atleta sa Sportswriters Association of Cebu-SMC Cebu Sports Awards nga gipahigayon sa SM City North Wing.

Gawas nga iyang gitino diri kanato nga komitido na gyud siya sa De La Salle ug gani nagsige na siya og ensayo, iya usab giangkon nga posibling sa 2015 pa gyud siya makaduwa sa UAAP.

Kini tungod sa bag-ong lagda nga giluwatan karon sa mga kadagkuan sa UAAP nga kinahanglan ang mga foreigner mokompleto una og duha ka tuig nga

residency una pa kini lehitimong makaduwa.

Kaniadto tagsa ra man unta ni katuig ug karon ilang giinat og laing usa ka tuig. Apan gipasabot ni Mbala nga wa pa gyud diay ni ma

finalize kay dunay pipila ka mga eskuwelahan dili pabor niini.

Pero ang nakontrobersiyal gyud kaayo karon sa UAAP mao kining ilang laing bag-ong lagda nga kon ang

high school graduate nilang atleta mobalhin gani og laing eskuwelahan inig college, duha pa usab ka tuig nga di kini makaduwa.

Daghang mga ginikanan sa mga atleta ang nagreklamo niini ug gani mora og magdako ni kay duna na may senador nga miintervene niini.

Ang naigo og maayo niini, mao ang Sugboanong si Jerry Pinggoy, ang back-to-back high school MVP sa Far Eastern University.

Gusto ni Pinggoy nga adto na moduwa sa Ateneo sa iyang pagtungtong sa

college pero tungod ning maong balaod magpaabot pa siya og duha ka tuig. Mora og gisilutan na hinuon siya.

Ambot og unsay lohika sa mga kadagkuan sa UAAP ning maong lagda nga ila na man hinuong but-an ang mga bata kon asa moeskuwela.

Di ba edukasyon man unta maoy angay iprayoridad, ug katungod sa usa ka bata ang pagpili kon asa siya nga eskuwelahan motungha. Unsa may sala sa estudiyante nga ingon anion man nila?

Si Senador Pia Cayetano nanggilabot na ning reklamo sa mga ginikanan. Angay sab siguro moaksyon niini ang taga DepEd o kaha ang taga Commission on Higher Education (Ched) kay mga estudyante na gud ang nahitungdan niini.

Lisod na og manakud unya ning lagdaa dinhi sa atoa.

junmigs0622@yahoo.com