Nietes uyon sa rematch

GILIHOK na karon sa ALA Promotions ang rematch nila ni World Boxing Organization (WBO) junior flyweight champion Donnie “Ahas” Nietes ug Mexican Moises Fuentes.

Ang premirong panagsangka sa duha ka mga boksidor niadtong Marso 2 sa main event sa Pinoy Pride XVIII: World Champion vs. World Champion miresulta sa majority draw, nga parehong gikuwestiyon sa duha ka mga kampo.

Human dayon sa away, mismong si Mexican legend Marco Antonio Barrera ang mipadayag sa ilang tinguha alang sa usa ka rematch.

Si Barrera nianhi sa Sugbo aron paghatag og moral nga suporta kang Fuentes, kinsa gi- train sa igsuon ni Barrera nga si Jorge.

Nagkanayon si ALA Promotions president Michael Aldeguer nga mismong si Nietes gusto sab og rematch aron maklaro ang tanan.

Gipasabot ni Aldeguer nga wala nakauyon si Nietes nga gikuwestiyon sa kampo ni Fuentes ang resulta.

Gani alang sa kampo ni Nietes, ang ALA fighter mao gyud unta ang angayang midaog sa maong away.

“Fuentes wants a rematch and Donnie wants a rematch. Both fighters want to prove who really won the first fight,” pasabot ni Aldeguer.

Matod ni Aldeguer nga sa inisyal nilang plano, ipahigayon ang rematch karong Hulyo sa gawas sa nasod, posible sa Amerika.

Gipasabot ni Aldeguer nga nagdepende pa ang tanan sa kapaspas sa pag-alim sa duha ka mga gisi nga naangkon ni Nietes sa premirong away.

“It depends on what the doctors will say. Lisod man gud kon dili makapraktis og sakto si Donnie tungod sa iyang gisi,” batbat ni Aldeguer.

Si Nietes aduna’y 311-4, KOs nga rekord samtang si Fuentes anaa’y 26-1-1, 20 KOs nga baraha.