IKA-23 NA!
Heat nakaipsot sa hudlat sa Celtics
GIPATAPSINGAN sa Miami Heat ang hosts Boston Celtics, 105-103, aron inaton ang ilang sunodsunod nga kadaugan ngadto sa 23 kagahapon sa National Basketball Association (NBA).
Ubay-ubay na ang teams nga naapsan sa Heat kon hisgutan ang sunodsunod nga kadaugan ug ang bugtong wala na lang nila magukdi mao ang Los Angeles Lakers, nga ningposte og 33 ka sagunson niadtong 1971-72 season.
Gipangulohan na sab ni LeBron James ang Heat pinaagi sa iyang 37 puntos lakip na niini ang nakapadaog nga puntos sa nahabiling 10.5 segundos.
“It means a lot. I know the history of the game. To be sitting in second place right now ... for us to be there and doing it the way we want to do it, it means a lot,” matod ni James.
Ang Celtics nakahatag gihapon og saktong kombati batok sa defending champions bisan wala ang ilang sinaligan sentro nga si Kevin Garnett.
Kini gumikan sa ngilngig kaayong gipakita nga duwa ni Jeff Green, kinsa nipugnit og career-high nga 43 puntos alang sa Celtics, nga nakadawat sab og 17 puntos gikan kang Paul Pierce.
Tam-is kaayo alang sa Heat kining maong kadaugan gumikan kay labing una kini nilang nahimo sulod sa balwarte sa Celtics sa 11 ka mga duwa.
Labing una sab kining daog sa Heat sulod sa balwarte sa Celtics sukad niadtong naporma ang ilang Big Three nga sila si James, Dwyane Wade, ug Chris Bosh.
“This was a passionate game, a lot of history between the two teams,” asoy ni Miami forward Shane Battier. “Not that it’s playoff intensity ... nothing’s like the playoffs.”
Maayo sab nga nakaduwa alang sa Heat mao si Mario Chalmers, kinsa niamot og 21 puntos samtang nidugang og 16 puntos si Wade. Ang Heat wala nakatilaw og pilde gikan pa niadtong Pebrero 1.
“It’s a special opportunity that we have with this group and you don’t want to take it for granted,” asoy ni Heat coach Erik Spoelstra.
“You want to treat every day as a special opportunity to be with this group, to share these moments together, but more importantly to take a step closer to going after our goal and every day that we improve puts us in a better position in a quest where nothing is guaranteed for anybody.”
Si Celtics coach Doc Rivers kuntento ra gyud sa gipakitang duwa sa iyang mga batos bisan sa ilang kapildihan.
Ang Celtics nakamugna pa og 17 puntos nga labaw sa first half apan hinayhinay kining gikitkit sa Heat.