MAG-BIKINI OPEN SA SEMANA SANTA DAKPON

NIBAHAD ang Police Regional Office (PRO-7) nga ila gyung dakpon ang mga tawo nga mopasiugda og kalihukan sama sa bikini open atol sa Semana Santa.

Kini maoy maoy giklaro ni Sr. Supt. Orlando Ualat, deputy regional director for operations (DRDO) sa PRO atol sa gipahigayong Talakayan sa Isyung Pulis (TSIP).

Matod niya nga ang kapulisan mopatuman sa balaud ug kon dunay molapas, dakpon.

Tungod niini, iyang giawhag ang katawhan nga likayan ang pagpahigayon og bikini open ilabi na sa Isla Bantayan sa Semana Santa.

Samtang, si Sr. Supt. Armando Radoc, hepe sa Police Community Rela- tion (PCR), nagkanayon nga ilang ipatuman ang provision sa Revised Penal Code (RPC) nga magsilot niadtong mopahigayon og malaw-ay nga kalihukan.

Samtang si Sr. Supt. Mariano Natuel Jr., acting nga hepe sa Cebu City Police Office (CCPO), niingon nga ang pagsul-ob sa bikini sa baybayon o beach di kalapasan.

Apan kon ang bikini isul-ob gawas sa beach unya sa pampublikong lugar, dinhi mopatuman ang kapulisan sa nalatid sa balaod.

Kon way mga indecent show ingon man wa pagtugot sa mayor ug sa lokal nga mga opisyal ug dunay ordinansa batok niini, dakpon sa kapulisan.

Nakontrobersiyal kaniadto nga bikini show sa lungsod sa Sta. Fe pipila na ka tuig ang nakalabay gikasagmuyo ni suspended Cebu Governor Gwendolyn Garcia, kinsa nipasaka og kaso batok sa mga artistang nalambigit.

Subay niini, si Supt. Glenn Ares, deputy provincial director for operation sa Cebu Provincial Police Office (CPPO), nipahibawo nga 42 ka mga police ang ilang ilakip sa dugang pulis sa Bantayan Island.

Samtang ang PRO7 mipahibalo nga duna say mga pulis nga di magpaila nga ipadala nila sa Bantayan Island nga moabag sa pagpaniid.

Ang Bantayan Island maoy paborito nga bisitahanan sa daghang mga turista panahon sa Semana Santa ug summer.