P4 MIL NGA HINABANG ALANG SA SENIOR CITIZENS IHATAG NA
SEGURADO nang makadawat ang 60,000 ka mga senior citizen sa tag P4,000 nga financial assistance gikan sa Cebu City Government karong Marso 25 ug 26 sa ilang tagsatagsa ka mga barangay.
Kini ang gibutyag ni Mayor Michael Rama human sa taudtaod nga paghanay sa tanang gikinahanglan aron mamahimong hamugaway ang pagpang-apud-apod sa ayudang pinansyal ngadto sa mga lolo ug loa.
“The final figure has always been P4,000,” matod ni Rama sanglit adunay report nga P2,500 lang ang mahatag sa dakbayan gumikan sa kakuwang sa pundo.
Gibutyag sa mayor nga nagtagbo sila si City Administrator Jose Marie Poblete ug City Treasurer Emma Villarete kagahapon aron desisyonan sa hingpit ang distribution sa hinabang pinansyal.
Gipasalamatan usab ni Rama ang iyang mga department head ug mga opisyal sa City Hall nga mainiton usab nga nitabang aron mahanay ang tanang gikinahanglan.
Gipasabot ni Rama nga ang financial distribution sa mga senior citizen mahinungdanong panerbisyo sa publiko agi usab og pagsaludo ngadto sa mga senior citizen sa ilang natampo sa dakbayan.
Ang mga opisyal sa City Hall gibahin ug gidestino sa nagkalainlaing barangay aron maoy momonitor ug maoy sumbungan kon adunay mga problema nga motumaw.
Mga opisyal sa City Hall pinangulohan ni Rama mopahigayon og misa sa Sto. Rosario Parish nianang sayo sa buntag sa Marso 25 dayon modiretso sa ilang tagsatagsa ka gimbuhaton sa mga barangay sa north district.
Isunod usab pagka Marso 26 ang 34 ka mga barangay sa south district.
Ang Cebu City Government adunay gitagana nga P600 milyones alang sa mga senior citizen sa 2013 nga bahinon sa upat ka distribution.