Dalaga nga mipalit sa tindahan naigo sa saag nga bala

DALAGA nga nagpalit og tubig sulod sa kan-anan nga iya sa usa ka police official naigo sa saag nga bala mga alas 8 sa miaging gabii dihang usa sa tulo ka mga batan-ong lalake nagpasalba.

Ang biktimang nidangat sa tambalanan human matapsingi sa bala ang ulo giilang mao si Florabelle Beduya, 25, usa ka office secretary, lumad nga taga Pogalo, lungsod sa Alcoy, nag-abang og lawak sa dapit.

Sa pasiuna nga imbestigasyon nga gihimo nila ni SPO4 Alex Dacua ug mga kauban sa Homicide Section sa Cebu City Police Office (CCPO) nagbutyag nga gikan nagkaon og barbecue ang biktima isip panihapon.

Nisulod kini sa tindahan nga gipanag-iya ni City Director Mariano Natuel sa Brgy. Sambag 1, dak- bayan sa Sugbo, aron sa pagpalit og mineral water.

Pipila ka minutes ang nakalabay, ilang nadungog ang usa ka masipang buto sa armas ug wa magdugay naigo ang biktima sa ulo ug natumba.

Naalarma ang mga tawo sulod sa tindahan ug naabot si Gerald, manghud sa biktima ug mao nay nidala kaniya sa tambalanan.

Dugang impormasyon nga nahipos sa kapulisan nga dihay tulo ka mga batan-on nga lalake nga naglakaw sa dapit, usa kanila may armas ug kalit nagpasalba.

Human sa maong insidnete, ang mga batanon nga wa pa mailhi nangawala sa dapit.

Si Natuel, sa iyang bahin, niingon nga di tinuyo ang maong hitabo ug aksidente lang nga naigo ang biktima.