Eddiegul, Samsam gusto ipadisqualify
NAGPLANO ang kampo sa oposisyon sa dakbayan sa Talisay nga ipa- disqualify sila si Kongresista Eduardo Gullas ug ang apo niini nga si Gerald Anthony “Samsam” Gullas sa May 13 election.
Gikuwestyon sa oposisyon kon tinuod ba nga nagpuyo sa dakbayan sa Talisay ang apuhan ug apo.
Si Kongresista Gullas modagan sa pagka mayor sa Talisay samtang si Samsam, sa pagka kongresista.
“Our lawyers are now contemplating to file disqualification cases against them (Eduardo ug Samsam) on the basis of their residency,” matod ni Konsehal Romeo Villarante.
Si Villarante nga kandidato pagka bise mayor sa Liberal Party (LP) nagkanayon nga sa mga pulongpulong nga ilang adtuan, daghan ang mangutana kon asa gyud magpuyo ang mga Gullas.
Apan si Kongresista Gullas nihulagway nga balikbalik ug karaang isyu ang gihisgutan sa oposisyon.
“Wala na gyud na silay laing ikalabay? Ila pa gyud nang daginoton?” matod ni Kongresista Gullas nga nahinabi sa
Sun.Star Cebu.
Gipasabot sa kongresista nga ang Korte Suprema nidesisyon na sa wa pa siya mahimong labing unang mayor sa siyudad sa Talisay nga lumolupyo siya sa maong dapit.
Base sa record sa Commission on Elections (Comelec) sa Talisay, si Kongresista Gullas narehistro sa Barangay Tangke samtang ang iyang asawa sa Barangay Maghaway.
Ang managsuon nga Samsam ug Konsehal Eduardo “Digul” Gullas III, rehistrado sa Barangay Dumlog.
“Pamilya man kaha sila, pero naglain-lain diay sila og puyo?” Villarante asked.
Sa iyang bahin, si Samsam nihulagway nga ang isyu sa oposisyon gi- tumong aron lang gyud dauton siya ug ang iyang apuhan aron dili botaran sa mga Talisaynon.
Ang mayoralty candidate sa LP nga si Johnny delos Reyes nagkanayon nga way bisan usa ka taga Tanke nga nakakita nga nagpuyo si Kongresista Gullas sa maong barangay.