`Kalbaryo’ ni Mike magpadayon

BISAN kon way pundo gikan sa Cebu City Government magpadayon ang ika-17 ka tuig nga “Buhing Kalbaryo” nga kanunay’ng gihimo sa dakbayan matag Semana Santa.

Atol sa katapusang session sa konseho kagahapon, wa pa gihapon maaprobahi ang P475,000 nga mao untay gamiton sa maong presentasyon nga naumol dihang konsehal pa si Mayor Michael Rama. Si Rama nagkanayon nga adunay daghang mga tawo nga mopaluyo sa tinuig nga kalihukan nga karon giapiki sa iyang mga kaatbang nga konsehal kinsa sakop sa Bando Osmeña Pundok Kauswagan.

Ang mayor nagkanayon nga posibling gamiton sa siyudad ang kwar- ta gikan sa Philippine Amusement and Gaming Corporation (Pagcor).

Gipadayag ni Rama di siya mapriso kon dili niya masunod ang mga guidelines nga gilatid sa Pagcor may kalambigitan sa paggasto sa kwarta nga ilang gihatag sa Cebu City Hall.

Basta ang kwarta mopadong sa katawhan, gamiton ang salapi alang sa culture and arts ug pagpalambo sa kabataan dili makadulot sa usa ka public official ang mga guidelines kay di kini makalabaw sa konstitusyon matod sa mayor.

“Any guidelines, any regulation should never go more than the root of the power and the source of life and that is the law,” matod ni Rama. Gitug-an niya nga ang bugtong makapabilanggo sa usa ka suloguon sa katawhan mao ang technical malversation apan aduna gihapoy mga opisyal nakalinggawas kay way ebedinsya nga nakakwarta sa maong trans-aksyon.

Apan ang atensyon ipatawag sa Ombudsman, dugang pa ni Rama, kinsa usa ka manlalaban, uban sa pagbutyag nga nakadaog siya og kaso didto sa Korte Suprema panahon sa iyang pagpanglaban.

Gisaway usab niya ang konseho nga namulitika sanglit sa nanglabay nga mga “Buhing Kalbaryo” di gyud malangay ug kanunay nga adunay pundo ang maong kalihukan.