Palma makigkita sa Santo Papa

MOBIYAHE unya si Cebu Archbishop Jose Palma paingon sa Vatican sa sunod buwan aron makigkita ni Pope Francis.

Personal nga dapiton sa Arsobispo ang bag-ong Santo Papa alang sa ipahigayon nga International Eucharistic Congress sa 2016 dinhi sa Sugbo.

Si Palma nisaulog sa iyang ika-63 nga kasumaran sa adlaw nga natawhan kagahapon pinaagi sa usa ka misa nga gihalad sa kapilya sa Archbishop’s Palace, dakbayan sa Sugbo.

Pagka kaadlawon, gihalaran siya og awit sa mañanita sa mga sakop sa nagkadaiyang mga lay organization, kaparian, katekista ug seminarista.

Sa iyang wali, siya niawhag sa tanan nga magtinabangay ug mopaambit kanunay sa mga grasiya ngadto sa nanginahanglan.

Samtang si Palma ni- hangyo sa mga Sugbuanon nga moobserbar sa tinuoray nga katuyoan sa Semana Santa ug likayan ang hilas ug malaw-ay nga mga pasundayag.

Matod niya ang panahon sa kwaresma, panahon alang sa pag-ampo, pamalandong ug pagsakripisyo.

“I hope lang unta na this being a season of prayer and reflection, we should try to appreciate the many shows that are religious in nature. If people will do such (lewd) shows, there are other times of the year for that, right?” nagkanayon ang arsobispo.

Si Acting Governor Agnes Magpale unang nipasidaan nga hugot gyud nga gidili ang pagpahigayon og bikini show sa lalawigan sa Sugbo labi na sa Bantayan Island atol sa Semana Santa.