Ang pamahayag ni Dakay
WA kaipsot si Msgr. Achilles Dakay, tigpamaba sa Archdiocese sa Sugbo, sa mga pagsaway human sa iyang makapakurat ug kontrobersiyal nga pamahayag kalabot sa bag-ong napiling Santo Papa nga si Pope Francis.
Makapakurat kay tiaw mo bay usa ka opisyal sa simbahang Katoliko apan di diay ka motuo sa kaagi sa bag-ong Santo Papa. Di siya kombinsido nga si Papa Francisco nagpuyo lang sa yano ug simpli nga kinabuhi bisan pa man og anak kini sa pamilyang adunahan niadtong usa pa kini ka Arsobisyo sa Buenas Aires, Argentina.
Di motuo si Dakay nga mosakay lang kini og pampublikong sakyanan, magluto sa iyang kaugalingong pagkaon ug nagpuyo kini sa usa lang ka apartment nga siya ra mismo ang nag-abang sa dihang usa ka pi kini ka Arsobispo didto sa Buenos Aires, Argentina.
Nakontrobersiyal ang maong pamahayag tungod kay samtang ang kinabag-an nga ordinaryong sakop sa 1.2 bilyones nga Romano Katoliko mihangop niini, si Dakay nga mismo usa ka opisyal nagdumili sa pagtuo.
Kon yano og ordinaryo pa unta siyang tawo nga nakasulti niini mahimong dili kining makontrobersiya apan isip usa sa tinamod ug tinahod sa mga Katoliko makapasurprisa ang maong pamahayag.
Tinuod nga iyang kaugalingong opinion lang ang iyang gipamahayag apan sa iyang pagluwat niini wala mawagtang kaniya ang posisyon isip tigpamaba sa Archdiocese sa Sugbo.
Sa dihang iyang nahibaw-an nga nasentro sa kontrobersiya ang iyang pamahayag, dali kining mipahid sa mga media kinsa iyang gipasanginlan nga nasipyat pagsabot sa iyang pamahayag.
Ambot og ning bahina matuohan pa ba kaha si Dakay sa kinabag-an.