Wa na tagda
Dear Noy Kulas,
Tawga lang ko sa ngalan nga Marcos, 23, lumad nga taga Parian siyudad sa Sugbo. Nagpadala ako nimo aning akong suliran kabahin sa akong mga amigo. Naproblema man gud ko kay di na man gud sila ganahan magpakita nako. Wa sab kahibawo unsay ilang gikasuk-an nako.
Sa ako lang nahinumdum nganong nag ingon ana sila, naa man goy higayon nga naa miy sabot nga manglakaw unya wa ko makatunga kay naay importante kaayong giobertayman sa trabaho. Unya wa sab ko kakontak nila. Komplikado kaayo akong schedule.
Hangtod karon naglibog ko kon unsaon nako sila pagesturya kay kon ako silang ipatawag, di man manunga unya kon ako sab nga teksan, mo- reply man apan moingon nga busy sila. Moangkon ko nga naa koy sayop apan ako na lang gyud ang mo- adjust sa ilaha kay ako man ang maguwang og edad sa ilaha.
Unsay maayong buhaton nako para magkabalik among maayong pag-amigohay kay kon ako ang pabut-on? Di ko gusto nga mawala sila isip akong mga amigo.
MARCOS Marc,
Naa gyuy mga higayon nga ang mga managhigala di magkasinabtanay. Di ka sab makabasol nila kay gawas nga wa ka makatunga, wa ka pa gyud mo- communicate nila. Bisan nisulti lang unta ka pinaagi sa text nga di ka makatunga kay pila na lang bayay pag communicate rong panahuna. Kay ako bitaw kon duna miy sayo kaayo nga ride sa bukid unya maglisod ko og tunga kay dugay ko nakatug, mobangon lang gyud ko aron mo- inform nga di ko makakuyog. Di baya lalim nga maghuwat ka sa tawo nga nitangdo unya di motunga ug di pa gyud mopahibawo nga di makatunga ug mangatarungan nganong wa siya makahimo.
Anyway, kon di sila makig-atubang nimo, teksi silang tanan diin imong isulti kanila ang tanang rason nganong wa ka makatunga ug makapahibawo nila. Pangayo sab og pasaylo nila. Naa ra nila kon ila ka bang pasayluon o di. Basin gasabot lang sab na sila nga ila kang patagmon pinaagi sa di pagtunga ug pagbalibad nimo aron sa sunod, di ka na mopalpak sa inyong sabot.
Ayaw kasuko ug pagdumot kon di man gyud sila maulian. Moabot ra ang panahon nga makasabot ra sila nimo. Naa ra nila kon dawaton nila o di ang imong katarungan. Ang importante nga nagpaubos ka pinaagi sa pagpangayog pasaylo kanila. Kon tinuod silang mga higala, makasabot ug mopasaylo sila kanimo. Kay trabaho na gani ang hisgutan, priority gyud na kay mao nay imong panginabuhian.
NOY KULAS