Mga pulis, bombero pagasolinahan

GUSTO sa konseho sa dakbayan sa Sugbo nga himuong ekslusibo ang paggamit sa P88.9 milyones nga pundo alang sa fuel, oil ug lubricant sa mga sakyanan nga gipanag-iya sa Cebu City Government.

Kini human gibasura ang kausaban sa provision sa City Ordinance 2348 nga mag-apil unta sa mga sakyanan nga iya sa national government sama sa Commission on Election cars, patrol cars, fire trucks ug uban pa nga gipalabang ni Konsehal Joey Daluz III.

Pinaagi sa 13-2 nga botasyon sa mga konsehal, sila ra si Konsehal Edgar Labella ug Daluz ang niuyon nga ipalabang ang maong kausaban apan wa silay nahimo sa gidaghanon sa mga konsehal sa Bando Osmeña Pundok Kauswagan (BOPK).

Si Edu Rama nga kaabin sa Team Rama wa makatunga uban nilang BOPK Councilors Rodrigo Abellanosa ug Raul Alcoseba.

Ang Cebu City Government sukad sa dugay nang panahon kanunay nang maghatagan sa nahisgutang mga ahensiya sa gobiyerno apan karon gidid-an na kini sa konseho.

Apan si Mayor Michael Rama, sa iyang bahin, nagkanayon nga bisan pa man sa kasamtangang ordinansa nga nagdili sa paghatag og gasolina sa maong mga ahensiya, tubilan gihapon ang ilang mga sakyanan.

Gihimong sanglitanan ni Rama na kon ang mga pulis ug bombero way gasolina ug di makaresponde sa mga alarma kay way gasoline, mamahimong mabasol ang mayor.

Kon mangayo usab sila og gasolina sa private sector, mamahimo na usab silang magawngan sa ilang mga lihok.