Naa’y ma-ko: Bautista

NAA gyu’y matikangkang sa main event sa Pinoy Pride XIX nga ipahigayon karong Abril 20 sa University of Southeastern Philippines (USEP) gym sa Davao City.

Mao kini ang gibuhiang pangagpas sa usa sa mga mopakita’g aksyon sa main event nga si Rey “BoomBoom” Bautista kagahapon sa opisyal nga paglusad sa promosyon sa The Royal Mandaya Hotel sa Davao City.

Si Bautista, kinsa adunay 342, 25KOs nga baraha, modepensa sa iyang World Boxing Organization (WBO) International featherwieght title sa main event sa promosyon nga gipasiugdahan sa ALA Promotions ug ABSCBN.

Mosuway pagilog sa korona ni Bautista mao si Mexican knockout artist Jose “Negro” Ramirez, kinsa adunay 243, 15KOs nga baraha.

“Naay matumba dire ani. Dili bastabasta ang kontra. Kung kinsa lang ang makauna ug makalusot,” batbat ni Bautista, kinsa lumad nga taga Bohol, sa artikulo nga migawas sa www.philboxing.com.

Giangkon sa trainer ni Bautista nga si Edito Villamor nga dili kini sayon nga tahas apan masaligon siya hilabi na karon nga mas nahashasan ang footwork ug jabs sa iyang batos.

“Grabe iya dedikasyon sa training ug paningkamot,” batbat ni Villamor.

Kini maoy labing unang higayon nga kombatihon sa Davao ang usa ka edisyon sa Pinoy Pride series.

“We’re truly very excited to be bringing for the first time the Pinoy Pride series to Davao City,” batbat ni ALA Promotions president Michael Aldeguer.