23 KARGADA NI LEBRON
SA PAGBALIK NIYA SA CLEVELAND
MOBALIK si LeBron James sa iyang yutang natawhan kargada ang makasaysayong 23 ka sunodsunod nga kadaugan sa Miami Heat sa National Basketball Association ( NBA) aron makigbatok sa kanhi niya team nga Cleveland Cavaliers.
Kini maoy labing unang duwa ni James sa Cleveland gikan niadtong labing una niyang paglangkat og NBA title isip usa na ka sakop sa Heat niadtong Hunyo sa miaging tuig.
Si James ug ang tibuok puwersa sa Heat mosugal sa ilang 23 ka sunodsunod nga kadaugan batok sa Cavaliers, nga seguradong hangtod ning panahuna nagkumkom gihapon sa sakit nga gibilin ni James sa iyang pagbiya.
Ang Cavaliers, nga adunay 22-45 nga baraha, wala na’y poruhan nga makasulod sa playoffs apan ang kadaugan batok kang James seguradong makahatag gyud kanila og duhang kadasig aron mas mokayod pa sa umaabot.
Apan labing seguro, dili motugot si James ug ang Heat niini gumikan kay aduna pa sila’y giapas nga kasaysaysan.
Ang 23 ka sunodsunod nga kadaugan sa Heat maoy ikaduhang labing taas sa kasaysayan sa NBA.
Ang naglabaw na lang niini mao ang 33 nga gimugna sa Los Angeles Lakers niadtong 1971-72 season.
“It’s a special team,” batbat ni James. “It’s a special ride right now that we’re on. I think the best thing about it is we’re doing it together. We’re doing it for one another and we just want to try to keep it going.”
Sa una niyang pito ka mga tuig sa NBA, si James nagduwa sa Cleveland nga duol ra kaayo sa Akron diin siya nahimong high school phenomenon.
Apan ubos sa kampo sa Cavaliers, nakaamgo si James nga kuli kaayong matuman ang iyang pangandoy nga makalangkat og NBA title gumikan kay wala siya’y katimbang.
Bisan sa kabangis ni James sulod sa rectangle nga korte, ang Cavaliers naglisod gyud sa ilang kampanya sa playoffs.
Nakasulod sila sa finals sa labing unang higayon niadtong 2007 apan gibutlogan sila sa San Antonio Spurs, 4-0, sa series.
Niadtong 201011 season, si James nakahukom nga mobalhin sa Miami aron makigtambayong nila ni Chris Bosh ug Dwyane Wade.
Nakasulod sa finals ang Heat niadtong higayuna apan gipakyas sila sa Dallas Mavericks.
Nakasulod pagbalik sa finals ang Heat sa miaging season ug ning higayuna ninglampos sila batok sa Oklahoma City Thunder ug naangkon ni Jame ang gipangandoy niyang titulo sa labing unang higayon.
Ning mao nga season, nindot gyud kaayo ang dagan sa Heat. Gawas sa ilang 23 ka sunodsunod nga kadaugan, kasamtangan nilang gigunitan ang overall leadership ug posible nilang maangkon ang no.1 nga puwesto inig sugod sa playoffs.
Kon mahimong no.1 ang team, maggunit kini og homecourt advantage sa kinatibuk-ang playoffs bisan kinsa ang kontra.
“It’s a special opportunity we have with this group and you don’t want to take it for granted,” batbat ni Heat coach Erik Spoelstra.