Thunder giusban sa Nuggets

GIPANGPUKAN na sab sa Denver Nuggets ang grabe ka inilog ug hosts Oklahoma City Thunder, 114-104, kagahapon sa National Basketball Association (NBA).

Kini maoy ika-13 nga sunodsunod nga kadaugan sa Nuggets ug labing una kini nilang nahimo sukad sa ilang pagsulod sa NBA.

Gipangulohanj ni Ty Lawson ang Nuggets pinaagi sa iyang 25 puntos samtang nidugang og 20 puntos ug siyam ka assists si Andre Miller.

Ang Nuggets naggukod sa halftime apan nakontrolar niini ang duwa sa 3rd quarter ug gikan niadto, wala na gyud sila motugot nga mailog pagbalik sa Thunder ang labaw hangtod na sa katapusang gutlo.

Ang Nuggets maoy bugtong team nga nakapilde sa Thunder sulod sa tulo ka mga higayon karon nga season.

Ang Thunder gipangulohan ni Kevin Durant pinaagi sa iyang 34 puntos samtang nihatag og 25 puntos si Russell Westbrook.

Sama sa naandan, kadaghanan sa puntos sa Nuggets nagagikan sa ilawom nga bahin nga mao gyud ang ilang kinaham.

Ning duwaa, naposte sa Nuggets ang labing dako nilang natigom nga puntos gikan sa ilawom karon nga season. Niabot kini og 72.

Gikan sa 65-66 nga biya sa halftime, ang Nuggets miilog sa labaw sa sayong bahin sa 3rd quarter pinaagi sa three-point shot ni Danilo Gallinari ug milahos na gyud sila paingon sa kadaugan.

Ang Nuggets naa karon sa ikaupat nga dapit sa Western Conference dala ang 47-22 nga baraha samtang nagpabilin sa ikaduhang dapit ang Thunder bitbit ang 50-18 nga rekord.