Brian Viloria andam na

ANDAM na si World Boxing Organization (WBO)/ World Boxing Association (WBA) flyweight champion Brian Viloria sa iyang pagpakigbatok kang Mexican Juan Francisco Estrada karong Abril 6 sa Macau.

Nagkanayon si Viloria nga hapsay ang dagan sa iyang ensayo ubos sa paggiya ni Marvin Somodio, ang Filipino assistant trainer ni Freddie Roach sa WildCard gym sa California.

Gipasabot ni Viloria nga ganado siya sa training hilabi na kay ang higanteng television network nga HBO maoy mopasalida sa away. Labing una kining away ni Viloria sa HBO.

“Its something I’ve been looking forward to for a long time,” matod ni Viloria sa interbyu sa www.philboxing.com kabahin sa HBO. “I will take that moment to do my best and entertain the fans.”

Matod ni Viloria nga dili bastabasta nga kontra si Estrada apan gumikan kay nindot gyud kaayo ang iyang preparasyon, masaligon siyang molampos ning awaya.

“Estrada is a warrior and tough like most Mexican fighters but I’ve done my homework and know how to pull off a win,” dugang ni Viloria.

Sa laing bahin, gitataw ni Viloria nga sa matag kontra nga iyang sagubangon, aduna siya’y kausaban nga himuon sa iyang inawayan nga makatabang kaniya aron makabira og kadaugan.

Gipasabot niya nga hangtod karon, padayon pa siyang nagkaton og lainlaing estilo nga alang kaniya makatabang og dako sa iyang kampanya.