4 PATAY SA PINUSILAY

Pulos giingong mga gun-for-hire, drug pushers nga nagbase sa Consolacion

NASIKOP. Duha sa pipila ka mga tawo nga naabtan sa sulod sa mga balay nga gipangronda sa kapulisan sa Police Regional Office (PRO-7), Cebu Provincial Police Office (CCPO) ug Consolacion police sa Brgy. Polpogan, Consolacion, Sugbo. Upat ka mga tawo ang napusilan sa kapulisan dihang giingong ningsukol sa mga pulis, ug gideklarar nga dead on arrival sa ospital. Nakuha gikan sa mga balay ang granada, mga armas ug gituohang shabu ug mga galamiton sa pagsuyop. Estorya sa pahina 2.

GITUOHAN sa kapulisan sa rehiyon ug Sugbo nga napiangan ang mga grupo sa mga kriminal human nila mapatay ang upat ka armadong mga tawo sa ilang dungan nga raid sa Consolacion, Sugbo kagahapon sa buntag.

Ang upat giingong ningsukol sa kapulisan hinungdan nga sila napusilan ug gideklarar nga dead-on-arrival sa gidad-an nilang tambalanan.

Mga high-powered nga mga armas ug drugas ang nasakmit sa joint operation sa Provincial Anti-Illegal Drugs Special Operations Task Group (PAIDSOTG), Regional Anti-Illegal Drugs Special Operations Task Group (RAIDSOTG 7), Regional Intelligence Division (RID-7), Provincial Intelligence Branch (PIB) Cebu Provincial Police Office (CPP) ug sa Consolacion police kagahapon sa buntag sa Brgy. Polpogan.

Kini maoy gibutyag ni Sr. Supt. Patrocinio Comendador, direktor sa kapulisan sa lalawigan sa Sugbo, human sa ilang gipahigayong operasyon batok sa grupo nila ni Francisco Vilanueva Ariva @alias Boyet, Elvira Manlisi, Vicente Judaya ug Jerry Bugtai.

Ang kapulisan nagdala og upat ka mga search warrant, tulo niini alang sa illegal possession of firearms ingon man usa ka search warrant sa illegal drugs nga giisyu ni Judge Teresita Abarquez, sa Regional Trial Court (RTC-7) Branch 56 sa dakbayan sa Mandaue nga gipetsahan niadtong Marso 20, 2013.

Sa ilang pag- raid sa mga balay, napatay sa kapulisan ang upat ka armadong mga tawo nga nakigpinusilay kanila nga giilang sila si Vicente Judaya, Ian Siacol, Jerson Resma, ug Reneboy Tariao.

Dali silang gipangdala sa Eversley Child Sanitarium sa Barangay Jagobiao, dakbayan sa Mandaue, apan gipangdeklarar nga dead on arrival.

Si Comendador niingon nga tungod sa pagkasikop ug pagkapatay sa upat ka mga sakop sa maong grupo, hayan moos-os na ang mga insidente sa pagpamusil sa lalawigan.

Gipadayag niya nga ang maong grupo, gawas sa ilang pagpalusot sa illegal nga drugas sa Metro Cebu, mga sakop sab sila sa gun-for-hire.

Ang maong grupo usa sa duha ka dagkong mga grupo sa Sugbo nga ilang gigukod, diin ilang nasikop ang uban kanila sa miaging semana sa Liloan.

Tungod sa ilang kadaghang armas ingon man high-powered nga mga armas, ila kining sa pagkulikta niadtong nakakuha nila og drugas.

Wa sab nila isalikway ang posibilidad nga gamiton ang grupo atol sa umaabot nga election karong Mayo.

MENSAHE

Si Chief Supt. Marcelo Garbo Jr. director sa PRO7, nipadayag nga tungod sa ilang usa ka buwan nga surveillance sa grupo, nahitabo ang pinusilay.

Gipadayag niya nga pinaagi sa maayong koordinasyon sa ilang intelligence units, nasugpo ang grupo.

Naka-ipsot ang mga lider sa grupo atol na sa shootout tali sa kapulisan.

Hatagag pasidungog ni Garbo ang mga pulis nga naglangkob sa malampusong operasyon.

Alang kaniya nagsilbi kining mensahe sa mga kriminal nga ang kapulisan seryoso sa ilang tinguha sa paggukod niadtong naghulga sa kumunidad ingon man sa katawhan.

MIHIMAKAK

Si Bugtai, 33, minyo, habal-habal driver, usa sa mga subject sa warrant, nisulti sa Sun.Star Super

balita nga planted sa kapulisan ang mga armas, granada, mga bala ingon man drugas nga nakuha gikan kaniya.

Matod niya nga wa siyay armas ingon man wa siya mamaligyag illegal nga drugas sa ilang dapit sanglit isip habal-habal driver, duna siyay negosyong videokihan sa ilang lugar.

Gipadayag niya nga daghang mga tawo nga magsulod gawas sa iyang videokihan lakip na kadtong ubang target sa search warrant hinungdan nga naglibog siya nganong nalakip sa target sa kapulisan.

“Naluoy ko sa akong anak nga mi- graduate sa elementary kagahapon sa buntag. Wala ko katambong ug ang akong asawa kay gisikop man ko. Wala koy sala,” dugang ni Bugtai.

Iya na lang atubangon ang maong kaso.

HULGA

Si Elvira Manlise, nagkanayon nga wa siya makahimo sa pagsukol sa iyang kanhi gikarelasyon nga si Ariva sanglit armado kini ug sa panahong mopalag siya, hulgaon siyang patyon.

Matod niya nga wa siyay mahimo kon sila si Arriva mosulod sa iyang tulo ka mga balay ug anha pa magrepake sa drugas. Lakip nga walay mahimo ang iyang pamilya. “Buk-an man daw mi niya sa ulo kon motug-an mi sa mga pulis. Ni- report mi kaniadto pero wala man madakpi. Dugay na kaayo ni sila diha,” dugang ni Manlisi.