Habalhabal driver gipusil, patay

USA ka drayber sa habalhabal ang gipusil-patay human gipauwana’g bala sa duha ka mamumuno nga nagsakay sa motorsiklo sa miaging kaadlawon sa Barangay Cogon, lungsod sa Dumanjug.

Si Noel Gabotero, 30, minyo ug taga Barangay Candabong, Dumanjug namatay human makaangko’g samad pinusilan sa iyang luyong bahin sa lawas ug ulo.

Wala pa mailhi sa kapulisan ang duha ka mga mamumuno nga nagsakay sa motorsiklo nga paspas nisibat palayo sa lugar.

Si SPO2 Florencio Clarion, desk officer sa Dumanjug Police Station, nagkanayon nga ang biktima nagsakay sa iyang motorsiklo paingon sa Proper dumanjog, sakay ang iyang igsoong si Miriam Gabotero Cristobal, 25, ug bana nga si Junrey Cristobal.

Apan sa pag-abot sa nahisgutang lugar kalit silang gipusil sa nagsunod nga mga suspek hi- nungdan nga naigo ang biktima suwerte ang iyang igsuon ug bayaw kay wala maigo.

Gidali kini sa pagdala sa Vicente Sotto Memorial Medical Center (VSMMC) apan gideklarar nga dead- on-arrival (DOA).

Si Clarion, miingon nga ang biktima naalaan lang sa duha ka grupo nga nagkaaway sa nahisgutang dapit hinungdan nga dihang naagi gipusil.

Sumala pa niini nga dunay duha ka grupo sa maong lugar nga nagbawos-bawos sa ilang pagpinusilay tungod sa ilang mga away-away sa pamilya.

Wala pa hinuon nila mailhi kun si kinsa ang mga pangalan niini tungod kay wala makaila ang igsuon ug bayaw sa biktima sanglit ngitngit dihang nahitabo ang krimen.

Ang kapulisan nakarekuber didto sa crime scene sa unom ka kabhang sa kalibre .45, usa ka buhing bala ug kabhang, ug 5.56 caliber pistol.