Tubag ni Comendador

ANIA ang tubag ni S/Supt. Patrocenio Comendador, Provincial Police Office Director kabahin sa reklamo sa iyang mga sakop sa iyang programang nightwatch nga napatik kagahapon dinhi sa atong lindog.

Dear Bob,

Kining reaction sa sender common ra ni sa mga pulis mga moresist og bagong idea o programa. Ang paghimo sa nightwatch mao ang pagsupport batok sa mga krimen nga mas daghan nahitabo sa Metro Cebu ug gamay sa ubang mga lungsod. Inay ato sila ireassign sa Metro Cebu ato gihimo once a month morender og night watch duty ang tanang kapolisan sa CPPO. Hapit naman ni magusa ka tuig ug karon man lang mi nakadawat og reklamo nga sama niini. Ang uban gipasabot namo matag duty nila.

Atong gipaminaw ang ilang mga suggestion ug giadjust nato effective adtong Lunes. Dili na sila mobalik sa provincial headquarters ug adto ra sila moout sa asa nga station diin sila gibutang anang adlawa. Ang taga north, adto ra sa Metro Cebu north i- deploy ug ang taga south adto sa Metro Cebu south. Wala pa siguro na siya kahibawo sa bago nga kausaban. Hangtod matanaw nato nga misanong na ang kapolisan sa mga programa, ako ni i- decentralize didto sa mas duol pa nga lugar.

Ato sad ni gihimo para macheck nato regularly ang ilang pagsulob sa uniform ug mga equipment nga di kasagaran mainspection base sa standard tungod sa kalayo sa pagsupervise sa mga police stations.

Kabahin sa firing, ato girequire ang tanan nga moduty sa nightwatch pag- fire ug 15 rounds para matanaw ang ilang kahanas mintras tanto magduty sila. Ang reload nga bala tag 6.50 pesos ang usa kon mapa- load sila bisan asa nga gunstore ug libre basta revolver kay mao ra man say naay supply. Kutob ra ni makafire sila matag usa ang tanan para maevaluate kay kaayohan man ni kaysa makagasto pa og dako sa sugal.

Naanad man god sa kahayay ang uban nato nga mga polis sa probinsiya mao nga duna gani mga kausaban moreklamo dayon. Daghan ang nakauyon ani base sa mga feedback ug maminaw man sad ko og mga suggestion kay before namo ni gilusad amo gikonsulta ang kadaghanan. Karon naganam kakunhod ang ato krimen tungod sa ato programa nga ato madungagan og polis para visibility ang mga lugar nga nagkinahanglan.

Ato sad pahinumdoman ang tanan nga ang Cebu dili lang Tabogon nga menos og krimen o Talisay diin taas og krimen kon dili tibuok lalawigan ng gikinahanglan hugpongan. Ako giawhag katong dunay pagsupak nga ipaambit ang iyang hunahuna matag monthly dialogue nga ato ginahimo diri sa CPPO headquarters. Dako ang akong pagduda nga nagsugod ni ang reklamo kay amo na man gipasakaan og administrative case ang katong wala motunga sa ilang nightwatch duty.

Kon reklamo kini nga makadaot sa pagsumpo sa krimen sama sa pangwarta, ako dayon kining ipaundang. Apan kini para sa kaayohan sa tanan nga Sugboanon ug dili sa mga polis lamang. Daghang salamat Super Bob ug hinaot mapasabot kini sa ubang kapolisan sa lalawigan.